Azərbaycan, Lənkəran, 12 yanvar / Trend , müxbir P.Əliyeva/ Azərbaycanın müxalif partiyasının referendumla bağlı təsis edəcəyi təşəbbüs qrupunun ilk bölgə qurumu yaradılıb.
"50 nəfərdən ibarət ilkin təşəbbüs qrupuna bir neçə nəfər bitərəf rayon vətəndaşı da üzv olub", - bazar ertəsi Trend -a Müsavat Partiyası Lənkəran rayon təşkilatının sədri Yadigar Sadıqov bildirib.
Trend -un arayışı: Azərbaycanın hakim partiyası "Yeni Azərbaycan", müxalif Müsavat Partiyası "Respublikaçılar" referendum üzrə təşəbbüs qrupları yaradıblar. Mərkəzi Seçki Komissiyası YAP-ın təşəbbüs qrupunun qeydə alınması üçün bildiriş verib.
Bundan əlavə, "Azadlıq" blokuna daxil olan Xalq Cəbhəsi, Milli Birlik Hərəkatı, Vətəndaş və İnkişaf partiyaları, o cümlədən "Azərbaycan Naminə" İctimai Birlik, Demokrat Partiyası və bir sıra qeyri-hökumət təşkilatları "Respublika və Qarabağ Uğrunda Vətəndaş Hərəkatı" təşəbbüs qrupunun yaradılması barədə qərar verib.
Hakim partiyanın icra katibinin müavini Mübariz Qurbanlı əvvəllər Trend -a bildirib ki, müxalifət partiyalarının referendum əleyhinə yaratdıqları təşəbbüs qrupları səmərəsiz olacaq.
Yanvarın 10- da 21 media rəhbəri referendumu dəstəkləmək məqsədilə "Azad söz" Təşəbbüs Qrupu təsis edib.
Həmin gün Azərbaycan Həmkarlar İttifaqları Konfederasiyası (AHİK) və bir sıra QHT-lər də Konstitusiyaya əlavə və dəyişikliklərə dair referendumla bağlı İctimai Təşkilatların Təşəbbüs Qrupunu təsis ediblər.
Yanvarın 12-də müxalif partiyaların digər bir hissəsinin təmsil olunduğu Demokratiya Uğrunda İttifaq "Cümhuriyyət Uğrunda Hərəkat" adlı təşəbbüs qrupu yaratmaq haqda qərar qəbul edib.
Azərbaycan parlamenti ötən ayın sonunda keçirilən iclasında Konstitusiyaya əlavələr və dəyişikliklər edilməsi ilə bağlı referendumun martın 18-də keçirilməsi barədə qərar qəbul edib.
Konstitusiyanın 29 maddəsinə dəyişiklik edilməsinə dair referendumun keçirilməsi barədə qərar verilib.
Azərbaycan Respublikası Konstitusiyasının mətninə dəyişikliklər yalnız referendum vasitəsilə daxil edilə bilər (maddə 152). AR Konstitusiyasının mətninə dəyişikliklər Milli Məclis və ya prezident tərəfindən təklif edilirsə, o zaman təklif edilən dəyişikliklər üzrə əvvəlcədən AR Konstitusiya Məhkəməsinin qərarı alınmalıdır (maddə 153).
Azərbaycan Konstitusiyası 1995 - ci ildə referendum yolu ilə qəbul olunub, 2002 - ci ildə Əsas Qanuna əlavə və dəyişikliklər edilib.
Sadıqovun sözlərinə görə, "Respublikaçılar" təşəbbüs qrupunun yanvarın 14 -də keçiriləcək təsis yığıncağında iştirak etmək üçün Lənkərandan 5 nümayəndə seşilib.
Məqalə müəllifi ilə əlaqə ünvanı: [email protected]
