Azərbaycan, Bakı, 15 yanvar / Trend , müxbir A.Hüseynbala/ "Azərbaycan Naminə" İctimai Forumun (ANİF) rəhbəri hesab edir ki, ölkənin müxalifət patiyaları və ictimai təşkilatları referendumla bağlı vahid təşviqat qrupu yaratmalı idi.
"Müxtəlif təşviqat qruplarının yaradılması nəzəri cəhətdən yaxşıdır. Ancaq praktiki cəhətdən qısa müddətdə 40 min imzanı toplayıb, təşviqat qruplarının hamısını qeydiyyatdan keçirmək çətin olacaq. Ona görə ki, vaxt məhduddur", - cümə axşamı Trend -a bir neçə müxalif partiya və ictimai təşkilatın təsis etdiyi "Qarabağ və Respublika Uğrunda Vətəndaş Hərəkatı"nda təmsil olunan "Azərbaycan Naminə" İctimai Forumun (ANİF) rəhbəri Eldar Namazov bildirib.
Trend -un arayışı: Azərbaycanın hakim partiyası "Yeni Azərbaycan", müxalif Müsavat Partiyası "Respublikaçılar" referendum üzrə təşəbbüs qrupları yaradıblar. YAP təşəbbüs qrupunun qeydə alınması üçün toplanan imza vərəqələrini yanvarın 14-də Mərkəzi Seçki Komissiyasına təqdim edib.
Bundan əlavə "Azadlıq" blokuna daxil olan Xalq Cəbhəsi, Milli Birlik Hərəkatı, Vətəndaş və İnkişaf partiyaları, o cümlədən "Azərbaycan Naminə" İctimai Birlik, Demokrat Partiyası və bir sıra qeyri-hökumət təşkilatları "Qarabağ və Respublika Uğrunda Vətəndaş Hərəkatı", Klassik Xalq Cəbhəsi, Azadlıq, Milli Demokrat, Böyük Azərbaycan və Xalq patiyalarının təmsil olunduğu Demokratiya Uğrunda İttifaq "Azərbaycan Xalq Cümhuriyyəti", Azərbaycan Milli İstiqlal Partiyası isə "Milli İstiqlal" təşəbbüs qrupunun yaradılması barədə qərar verib.
Hakim partiyanın icra katibinin müavini Mübariz Qurbanlı daha öncə Trend -a bildirib ki, müxalifət partiyalarının referendum əleyhinə yaratdıqları təşəbbüs qrupları effektsiz olacaq.
Azərbaycan parlamenti ötən ayın sonunda keçirilən iclasında Konstitusiyaya əlavələr və dəyişikliklər edilməsi ilə bağlı referendumun martın 18-də keçirilməsi barədə qərar qəbul edib. Konstitusiyanın 29 maddəsinə dəyişiklik edilməsinə dair referendumun keçirilməsi barədə qərar verilib.
Azərbaycan Respublikası Konstitusiyasının mətninə dəyişikliklər yalnız referendum vasitəsilə daxil edilə bilər (maddə 152). AR Konstitusiyasının mətninə dəyişikliklər Milli Məclis və ya prezident tərəfindən təklif edilirsə, o zaman təklif edilən dəyişikliklər üzrə əvvəlcədən AR Konstitusiya Məhkəməsinin qərarı alınmalıdır (maddə 153).
Azərbaycan Konstitusiyası 1995 - ci ildə referendum yolu ilə qəbul olunub, 2002 - ci ildə Əsas Qanuna əlavə və dəyişikliklər edilib.
Namazovun sözlərinə görə, vahid təşviqat qrupu yaradılsaydı, demokratik düşərgədə vahid əməkdaşlıq üçün imkanlar da geniş olacaqdı.
"Ona görə mən həm siyasi partiyaları, həm də ictimai təşkilatları birləşdirən geniş mərkəzin yaradılmasını təklif edirdim. Prosesin bu formada getməsi isə bizdən asılı deyil", - Namazov əlavə edib.
ANİF rəhbəri deyib ki, vahid təşviqat qrupu yaradılmasa da, müxalifət təbliğat kampanıyasını bir yerdə apara bilər. "Təklif etdiyimiz mərkəz yaradılsaydı, Dəyirmi masalar, konfranslar, müxtəlif sosial təbəqələrin forumlarının, eyni zamanda piket və mitinqlərin keçirilməsi üçün kifayət qədər gücümüz olacaqdı. Biz təşviqat qruplarının qeydiyyata alınıb-alınmamasından asılı olmayaraq, müxtəlif ictimai təbəqələri bir araya gətirən forumlar keçirəcəyik, artıq hazırlığa başlamışıq", - Namazov vurğulayıb.
Məqalə müəllifi ilə əlaqə ünvanı: [email protected]
