Azərbaycan, Bakı, 23 fevral / Trend , müxbir A.Hüseynbala/ Azərbaycanın müxalif partiyalarının referendumla bağlı təsis etdikləri təşviqat qrupları martın 1-də mitinq keçirmək üçün yenidən Bakı Şəhər İcra Hakimiyyətinə müraciət edib.
"Biz İcra Hakimiyyətinə aksiyanın keçirilməsi üçün Bakının bir neçə rayonu ərazisindəki 8 meydandan birinin ayrılmasını təklif etmişik", - bazar ertəsi Trend -a "Qarabağ və Respublka Uğrunda Hərəkat"da təmsil olunan Azərbaycan Xalq Cəbhəsi Partiyasının (AXCP) sədr müavini Həsən Kərimov bildirib.
Тrend Nеws-un arayışı: Azərbaycanda referendumla bağlı təsis edilən təşviqat qrupları fevralın 18-dən etibarən təbliğat kampaniyasına start veriblər.
Mərkəzi Seçki Komissiyasının qərarı ilə həftə ərzində bir dəfə 90 dəqiqə İctimai Televiziyada, 90 dəqiqə isə İctimai Radioda efir vaxtı müəyyənləşdirilib.
Televiziyada efir vaxtı saat 18:15-dən, radioda isə saat 20:15-dən başlayacaq.
Təşviqat kampaniyası zamanı bütün təşviqat qrupları üçün həm televiziyada, həm də radioda dörd dəfə pulsuz efir vaxtı ayrılacaq.
Referendumla bağlı qəbul olunmuş təqvim planına əsasən, təbliğat kampaniyası martın 16-da saat 24:00-da başa çatdırılmalıdır.
Martın 18-də Azərbaycanda ölkə Konstitusiyasına əlavə və dəyişikliklərin edilməsi üzrə referendum keçiriləcək.
Referendum üzrə "Yeni Azərbaycan", "Şəhər", "Tərəqqi", "Hüquq və demokratiya", "Vətəndaş Cəmiyyəti", "Davamlı İnkişaf Naminə", "Zəka", "Qarabağ və Respublika Uğrunda Hərəkat" və "Respublikaçılar" təşəbbüs qrupları MSK-da təşviqat qrupları kimi qeydiyyata alınıblar. "Abad kənd", "Azad söz", "Azərbaycan Xalq Cümhuriyyəti" və "Milli İstiqlal" təşəbbüs qrupları qeydiyyatdan keçməyib.
Azərbaycan Konstitusiyası 1995-ci ildə qəbul olunub, 2002-ci ildə Əsas Qanuna dəyişikliklər edilib.
Kərimovun sözlərinə görə, "Qarabağ və Respublika Uğrunda Hərəkat" və "Respublikaçılar" təşviqat qrupları hökumətin əvvəlcədən müəyyən etdiyi ərazilərdə kütləvi aksiyalar keçirmək niyyətində deyil. "Bu səbəbdən biz "Azneft", "Gənclər" meydanlarının, Teleteatrın binası ətrafındakı ərazinin, metronun Elmlər Akademiyası stansiyasının yaxınlığındakı "Cavid bağı"nın, Füzuli meydanının, Nəriman Nərimanov kinoteatrının qarşısındakı, Məşədi Əzizbəyov və Cəfər Cabbarlı heykəllərinin ətrafındakı meydanlardan birinin ayrılmasını təklif edirik", - AXCP-nin sədr müavini əlavə edib.
Təşviqat qrupunun nümayəndəsi deyib ki, martın 1-də Azərbaycanın 8 bölgəsində mitinqlərin keçirilməsi haqda da qərar qəbul olunub. "Bakıda nəzərdə tutulan mitinqlə bağlı artıq Şəhər İcra Hakimiyyətinə məktub göndərilib. Bölgələrdə isə təşəbbüs qruplarının təsisçiləri olan partiyalar yerli icra strukturlarına müraciət edəcəklər", - Kərimov vurğulayıb.
"Respublikaçılar" və "Qarabağ və Respublika Uğrunda Hərəkat" təşviqat qrupları fevralın 22-də Bakının mərkəzi meydanlarından birində mitinq keçirməyi planlaşdırırdı. Ancaq Bakı Şəhər İcra Hakimiyyəti onlara Bibiheybət qəsəbəsini təklif etdiyindən mitinq təxirə salınıb.
"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları, eləcə də bir neçə ictimai təşkilat, "Respublikaçılar" təşviqat qrupunu isə Müsavat Partiyası təsis edib.
Məqalə müəllifi ilə əlaqə ünvanı: [email protected]