Azərbaycan, Bakı, 18 mart / Trend , müxbir N.Abdullayeva /
"Azərbaycan Konstitusiyasına əlavə və dəyişikliklər edilməsi üzrə referendum yaxşı təşkil olunub, seçicilər məntəqələrdə fəal səs verirlər", - Azərbaycan Konstitusiya Məhkəməsinin sədri Fərhad Abdullayev hesab edir.
"Məncə, seçkilər yaxşı təşkil edilib və mən burada (seçki məntəqəsi) olduğum vaxt ərzində seçicilər səsvermədə fəal iştirak edirlər", - Bakının Səabil rayonunda səs verən Abdullayev bildirib.
Ümumilikdə məntəqədə 1266 seçici qeydiyyatdan keçirilib. Günorta saat 13:00-a onların artıq 36 faizi səs verib.
Çərşənbə günü Azərbaycanda Konstitusiyanın 29 maddəsinə əlavə və dəyişikliklərin edilməsi məsələsi üzrə referendum keçirilir.
Referendumda xüsusilə Azərbaycan Konstitusiyasının 101-ci maddəsinin beşinci bəndində yer alan "heç kim iki dəfədən artıq AR-nın prezidenti seçilə bilməz" hazırkı redaktəsinin, müharibə şəraitində aparılan hərbi əməliyyatlar növbəti seçkilərin keçirilməsini mümkünsüz edirsə, fəaliyyətdə olan dövlət başçısının səlahiyyət müddətinin hərbi əməliyyatlar bitənədək artırılmasını nəzərdə tutan redaktə ilə əvəzlənməsi nəzərdə tutulur. Azərbaycan prezidentinin səlahiyyət müddəti beş ildir. Hazırda dövlət başçısı olan İlham Əliyev 2003 və 2008-ci illərdə prezident seçilib.
Ümumilikdə ölkə Konstitusiyasının 29 maddəsinə 41 dəyişiklik edilməsi planlaşdırılır. Burada, o cümlədən hərbi əməliyyatlar aparılan zaman ölkə parlamentinə seçkilərin ertələnməsi, 40 min seçiciyə qanunvericilik təşəbbüsü hüququ verilməsi, şəxsin istəyinə qarşı video və ya audio yazılışların aparılması və onun şəkilinin çəkilməsinə qadağa qoyulması, Azərbaycanın sabiq prezidentlərinin maddi təminatı, eləcə də texniki xarakterli müddəаlar daxildir.
Azərbaycan Konstitusiyası 1995-ci ildə qəbul olunub, 2002-ci ildə Əsas qanuna əlavə və dəyişikliklər edilib
Məqalə müəllifi ilə əlaqə ünvanı: [email protected]