Gürcüstan, Tbilisi, 15 aprel / Trend , müxbir N.Kirtsxalia /
Gürcüstan XİN-i ümid edir ki, ATƏT-ə üzv ölkələr Yunanıstanın bu təşkilatın missiyasının Gürcüstanda saxlanılmasına dair yeni təklifini dəstəkləyəcəklər.
"Biz ümid edirik ki, ATƏT-in missiyası Gürcüstanda qalacaq", - deyə Xarici Siyasət İdarəsinin Siyasi Departamentinin direktoru Zurab Kaçkaçişvili bildirib.
Rusiya Federasiyasının XİN nümayəndəsi Andrey Nesterenko aprelin 9-da Rusiyanın ATƏT-in Gürcüstandakı missiyası ilə bağlı mövqeyini səsləndirib. O, belə bir müstəqil missiyanın Sxinvalidə də açılmasını tələb edib.
"Rusiya dəfələrlə ATƏT-in Gürcüstandakı missiyasının mandatının uzadılması istiqamətində müxtəlif tərəflərin səylərini məhdudlaşdırıb. Təəssüf ki, onun yalnız texniki cəhətdən uzadılmasına nail olunub. Bəzi hallarda Rusiyanın ATƏT-dəki nümayəndələri bu və ya digər məsələlərin müzakirəsində ümumiyyətlə iştirak etməyiblər", - deyə Kaçkaçişvili vurğulayıb.
Onun sözlərinə görə, "Rusiyanın əsas məqsədi avqust müharibəsi nəticələrinin leqallaşdırılmasından ibarət idi, lakin əlbəttə ki, ATƏT-in heç bir üzv ölkəsi bununla razılaşmadı".
"Bu gün hazırda ATƏT-ə sədrlik edən Yunanıstanın daha bir yekun təklifi var və biz ümid edirik ki, bu təklif təsdiq olunacaq", - deyə Gürcüstan XİN-in nümayəndəsi bildirib.
Məqalə müəllifi iləəlaqə ünvanı: [email protected]