Azərbaycan, Bakı, 13 may / Trend , müxbir C.Babayeva /
Azərbaycan Milli İstiqlal Partiyasında (AMİP) bələdiyyə seçkisində iştirakla bağlı fikir ayrılığı yaranıb.
"Partiyanın müəyyən qismi bələdiyyə seçkisinə AMİP-in təkbaşına, bir qismi isə birlik formasında qatılmasının tərəfdarıdır. Bələdiyyə seçkisi öncəsi şəraitə uyğun olaraq, seçkidə iştirak forması haqqında qərar partiyanın ali strukturunda veriləcək", - çərşənbə günü Trend -a AMİP-in mətbuat və təbliğat katibi Əli Orucov bildirib.
Azərbaycanda bələdiyyə seçkisinin bu ilin sonunda keçiriləcəyi gözlənilir.
Orucov bələdiyyə seçkisinə AMİP-in blok şəklində qatılmasının tərəfdarı olduğunu deyib. "Bələdiyyə seçkisi digər seçkilərdən həm xarakter, həm də yerli əhəmiyyətinə görə kəskin fərqlənir. Seçkidə iştirak etmək üçün birliyin yaradılması istiqamətində qeyri-rəsmi danışıqlar aparılır. Dil tapa biləcəyimiz siyasi qüvvələr var. Milli dəyərləri üstün tutan, ölkədə demokratikləşmə prosesinə təkan verməyə, cəmiyyətin siyasi fəallığını artırmağa çalışan, siyasi qüvvələrlə əməkdaşlığa hazırıq", - AMİP rəsmisi bildirib.
O, siyasi partiyalar arasında bloklaşmanın ideoloji əsaslara söykənməsini vacib heab edir. "Azadlıq" blokunda təmsil olunan partiyaların bir qismi liberal, digəri sağ-mərkəzçi, digərinin ideoloji prinsipləri bilinmir. Belə amorf birlikdənsə, ideoloji təməli olan birlik yaradılmalıdır. Blokda təmsil olunacaq partiyaların strateji hədəfləri aydın olmalı və onlar arasında səmimilik olmalıdır. Həmin qüvvələrin ambisiyaları imkanları ilə uzlaşdırılmalıdır", - Orucov deyib.
Onun sözlərinə görə, indiyə qədər müxalifət partiyalarının birlikləri çox təəssüf ki, qısa müddətdən sonra uğur qazanmayıb. "Onlar bu uğursuzluqda bir-birlərini ittiham edirlər. Hətta müttəfiq olmuş qüvvələr də bir-birlərinə qarşı əks ittihamlara başlayırlar. Bu nəticə etibarilə həm müxalifətin gözdən düşməsinə və həm də müxalifət partiyaları arasında soyuqluğun yaranmasına səbəb olur", - Orucov bildirib.
Trend -un arayışı: АMİP 1992-ci ildə yаrаdılаn və Аzərbаycаndа ilk dövlət qеydiyyаtınа аlınаn pаrtiyаdır. Etibar Məmmədov 2004-cü ilin sonunda partiyanın sədrliyindən istefa verdikdən sonra partiya daxilində parçalanma baş verib. Ondan sonra AMİP-in sədri olan Əli Əliyevə qarşı partiya daxilində narazılıq yarandığı zaman partiya üzvlərinin bir qismi AMİP-dən gediblər. Məmmədоv hаzırdа Bеynəlxаlq Dеmоkrаt İttifаqının (BDİ) sədr müаvinidir.
