Azərbaycan, Bakı, 15 may / Trend , müxbir C.Babayeva /
Azərbaycan Ziyalıları Birliyinin (AZB) sədri Eldəniz Quliyev eks-prezident Ayaz Mütəllibovun müxalifətin nüfuzdan düşməsi ilə bağlı səsləndirdiyi fikirlərlə bölüşdüyünü bildirib.
"17 il ərzində müxalifət partiyaları böyük şansları əldən veriblər. Müxalifət partiyaları xalqı təşkilatlandırıb mübarizəyə qaldıra bilmədilər. Xalqın mübarizəyə inamı və ümidini qırdılar və bu da bir çox hallarda müxalifət partiyaları liderlərinin iddia və ambisiyaları səbəbindən baş verdi", - cümə günü Quliyev Trend -a bildirib.
Trend -un arayışı: Azərbaycanın eks-prezidenti Ayaz Mütəllibov mətbuata ölkədəki siyasi vəziyyəti şərh edərkən bildirib ki, müxalifət nüfuzdan düşüb. Mütəllibov deyib ki, müxalifətin hamısı artıq anlayıb ki, problemlərin həlli üçün şəxsi ambisiyaları kənara qoymaq lazımdır.
1991- ci ildə Azərbaycan müstəqilliyini elan etdikdən sonra Mütəllibov ilk prezident seçilib. Sonra barəsində cinayət işi açılıb və 1992 - ci ildən Rusiyada mühacirətdə yaşayır. Eks-prezident Azərbaycanın Baş Prokurorluğunun ittihamı əsasında beynəlxalq axtarışa verilib. Mütəllibov dövlət çevrilişinə cəhd, qanunsuz silahlı dəstələrin yaradılması, zorla hakimiyyəti ələ almaq və digər ağır cinayətlər törətməkdə günahkar bilinir.
AZB sədri eyni zamanda 17 il ərzində müxalifətin heç nəyə nail ola bilməməsinin bir günahının da ziyalıların üzərinə düşdüyünü deyib. "Bu illər ərzində ziyalıların bir çoxu öz gücünü partiya hücrələrində xərcləyib puç etdi və anlaya bilmədilər ki, bu dövr ərzində üzdə olan siyasi rəhbərlər onlardan öz merkantil maraqları, bir çimdik intellektlərindən doğan böyük iddialarını təmin etmək üçün istifadə etdilər", - Quliyev bildirib.
Onun sözlərinə görə, ziyalılar dərk etməlidirlər ki, onların alın yazısı və əsas missiyası proseslərin orbitri, istiqamətvericisi olmaqdır. "Ziyalılar pozitiv inkişafın generatoruna çevrilmək əvəzinə kənara çəkildilər. Təbii ki, əsas günah siyasi müxalifətin üzərindədir. Siyasi müxalifət demokratik düşərgəni demokratik qüvvəyə çevirə bilmədi", - Quliyev deyib.
Trend -un arayışı: Azərbaycan Ziyalıları Hərəkatı 2003-cü ildə yaradılıb və 2007-ci ildə Ədliyyə Nazirliyində Azərbaycan Ziyalıları Birliyi kimi rəsmi qeydiyyatdan keçib. Təşkilatın məqsədi Azərbaycan ziyalılarının hüquqlarının müdafiəsi və müxalifətlə iqtidar arasında barışığa nail olmaqdır.
Məqalə müəllifi ilə əlaqə ünvanı: [email protected]