Azərbaycan, Bakı, 11 iyun / Trend , müxbir, A. Hüseynbala /
Azərbaycanın bir qrup müxalifət partiyasının təsis etdiyi ittifaq müxalifətin vahid seçki platformasının hazırlanmasını təklif edir.
"Biz bu məqsədlə təklif irəli sürən tərəf kimi müxalifətin ümumi konfransının keçirilməsinin tərəfdarıyıq", - çümə axşamı Trend -a Demokratiya Uğrunda İttifaqda (DUİ) təmsil olunan Klassik Xalq Cəbhəsi Partiyasının (KXCP) sədri Mirmahmud Mirəlioğlu bildirib.
Trend -un arayışı: Demokratiya Uğrunda İttifaq (DUİ) bundan əvvəl də "Qarabağ forumu"nun keçirilməsi təşəbbüsü ilə çıxış etsə də, "Qarabağ və Respublika Uğrunda Hərəkat"da təmsil olunan partiyalar həmin tədirdə iştirakdan imtina etdilər.
Mirəlioğlunun sözlərinə görə, konfrans baş tutarsa, bu zaman iqtisadı böhran əleyhinə komissiyanın və yeni Konstitusiya layihəsinin hazırlanması üzrə tanınmış mütəxəssislərdən ibarət komissiyanın yaradılması da müzakirə olunacaq. "Vahid seçki platformasının hazırlanmasına nail ola bilsək, bələdiyyə və parlament seçkilərində birgə iştirakla bağlı xüsusi komissiya da yarada bilərik", - KXCP sədri əlavə edib.
Mirəlioğlu deyib ki, məsləhətləşmələr zamanı DUİ-yə daxil olmayan bir sıra partiya və ictimai təşkilatlarla konfransın keçirilməsi üçün razılıq əldə olunub. "Qarabağ və Respublika Uğrunda Hərəkat"a gəldikdə, bu qurumda təmsil olunan bir sıra partiyaların funksionerləri öz fəaliyyətlərini bizim əleyhimizə sərf edirlər. Amma biz indiki şəraitdə qarşılıqlı ittihamların əleyhinəyik", - partiya sədri vurğulayıb.
Dеmоkrаtiyа Uğrunda İttifаqı 2005-ci il parlamеnt seçkisindən sonra müxalifətçi Klassık Xalq Cəbhəsi, Azadlıq və Milli Demokratiya partiyaları yаrаdıb. 2008-ci il sеntyаbrın əvvəllərində Böyük Azərbаycаn, nоyаbr аyındа isə Хаlq pаrtiyаlаrı DUİ-yə üzv qəbul оlunub. İttifаq bu pаrtiyaların məşvərət və əməkdaşlıq qurumudur.
"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları, eləcə də bir neçə ictimai təşkilat təsis edib.
Məqalə müəllifi ilə əlaqə ünvanı: [email protected]