Azərbaycan, Bakı, 06 avqust / Trend , müxbir C.Babayeva /
Azərbaycan ziyalılarının fikrincə, ölkədə yeni müxalif qüvvənin yaranmamasının iki əsas səbəbi var.
"Yeni müxalif qüvvənin yaranmamasının səbəbləri köhnə müxalifətin "arxivə getməmə"si və iqtidarın bunu istəməməsidir. Yeni müxalifət köhnənin yenidən bərpa edilməsi yolu ilə yarana bilər", - cümə axşamı Trend -a Azərbaycan Ziyalıları Birliyinin (AZB) sədri Eldəniz Quliyev bildirib.
Quliyev hesab edir ki, köhnə müxalifətin siyasi səhnədən gedib, yenisinin gələcəyini düşünmək düzgün deyil. "İndiki müxalifət partiyaları arasında gənclər, öz liderləri ilə həmfikir olmayanlar, daha mütərrəqi addımlar atmaq istəyənlər, demokratik dəyərlərə daha üstünlük verən və şəxsi maraqları ön planda tutmayan insanlar var. Hesab edirəm ki, onlara geniş imkanlar yaradılmalıdır", - o deyib.
AZB sədrinin fikrincə, müxalifətin nəinki Dağlıq Qarabağ məsələsi ilə vahid mövqeyi, heç vahid istəyi də yoxdur. "Münaqişənin həllində atılması vacib olan ilkin addım demokratik düşərgə və iqtidarın eyni mövqe nümayiş etdirməsidir. Bu məsələdə iqtidar-müxalifət bölgüsü olmamalıdır", - Quliyev bildirib.
O, millət vəkili Vahid Əhmədovun ölkədə siyasi müxalifətin olmaması ilə bağlı səsləndirdiyi fikirləri dəstəklədiyini bildirib. "Azərbaycanda siyasi müxalifətin olmaması həqiqətdir və bunu danmaq olmaz. Belə getsə, Azərbaycanda nəinki siyasi müxalifət, ümumiyyətlə heç müxalifət olmayacaq", - Quliyev deyib.
Trend -un arayışı: Azərbaycan Ziyalıları Hərəkatı 2003-cü ildə yaradılıb və 2007-ci ildə Ədliyyə Nazirliyində Azərbaycan Ziyalıları Birliyi kimi rəsmi qeydiyyatdan keçib. Təşkilatın məqsədi Azərbaycan ziyalılarının hüquqlarının müdafiəsi və müxalifətlə iqtidar arasında barışığa nail olmaqdır.
Məqalə müəllifi ilə əlaqə ünvanı: [email protected]