Azərbaycan, Bakı, 27 avqust / Trend , müxbir C.Babayeva /
Azərbaycanın müxalifət partiyalarının təmsil olunduğu Qarabağ və Respublika Uğrunda Hərəkat Seçki Məcəlləsinə hazırladığı əlavə və dəyişikliklər layihəsini ictimai müzakirəyə çıxaracaq.
"Layihə işçi qrupu tərəfindən partiya sədrlərinin müzakirəsinə təqdim olunub. Sədrlərin layihə ilə bağlı təklifləri ümumiləşdiriləndən sonra sənəd ictimai müzakirə üçün hazırlanacaq", - cümə axşamı Trend -a Qarabağ və Respublika Uğrunda Hərəkatda təmsil olunan Vətəndaş və İnkişaf Partiyasının sədri Əli Əliyev bildirib.
Trend -un arayışı: Qarabağ və Respublika Uğrunda Vətəndaş Hərəkatı bu ilin martın 18-də keçirilmiş referndum ərəfəsində yaradılıb. Hərəkatda Azərbaycan Xalq Cəbhəsi, Vətəndaş və İnkişaf, Liberal, Müsavat, Demokrat, Ümid partiyaları və bir neçə ictimai təşkilat təmsil olunur.
Hakim Yeni Azərbaycan Partiyası hesab edir ki, Seçki Məcəllləsinə ciddi dəyişikliklərin edilməsinə ehtiyac yoxdur. Azərbaycanda bələdiyyə seçkisinin bu ilin dekabrın ortalarında keçirilməsi nəzərdə tutulur.
Qarabağ və Respublika Uğrunda Hərəkatın Seçki Məcəlləsinə əlavə və dəyişikliklərlə bağlı layihənin bu həftənin sonunda yekunlaşdırılacağı gözlənilir.
"Partiya sədrlərinin qanuna əlavə və dəyişikliklərlə bağlı fikirləri işçi qrupunun növbəti iclasında sistem halına salınacaq. Həftənin sonunda Seçki Məcəlləsi və seçki komissiyalarının formalaşdırılması ilə bağlı əlavə və dəyişikliklər layihəsinin dəqiq konturları müəyyənləşəcək", - cümə axşamı Trend -a işçi qrupunda Müsavat Partiyasının təmsilçisi Gülağa Aslanlı bildirib.
Məqalə müəllifi ilə əlaqə ünvanı: [email protected]
