Azərbaycan, Bakı, 16 oktyabr / Trend , müxbir A..Hüseynbala/
Azərbaycanın müxalifət hərəkatında təmsil olunan partiya bələdiyyə seçkilərində təkbaşına iştirak edəcək.
"İdarə Heyətinin növbədənkənar iclasında bələdiyyə seçkilərində partiyanın iştirak etməsi haqqında yekun qərar qəbul edilib", - cümə günü Trend -a bir neçə müxalifət partiyasının təsis etdiyi "Qarabağ və Respublika Uğörunda Hərəkat"da təmsil olunan Azərbaycan Demokrat Partiyasının (ADP) mətbuat xidmətindən bildirilib.
Trend -un arayışı: Azərbaycanda bələdiyyə seçkisi dekabrın 23-də keçiriləcək. 1718 bələdiyyəyə 15682 bələdiyyə üzvünün seçilməsi nəzərdə tutulur.
Azərbaycanda bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Qəbul olunan qərar görə, seçkilərdə iştirak etmək istəyən partiya üzvləri öz təşəbbüsləri ilə namizədliklərini irəli sürəcəklər. "Qarabağ və Respublika Uğrunda Hərəkat"da böhran yarandığından bu hərəkata daxil olan siyasi partiyalarla qabaqcadan planlaşdırıldığı kimi bələdiyyə seçkilərində birlikdə iştirak etmək mümkün olmadı", - İdarə Heyətinin iclasında qəbul olunan bəyanatda vurğulanır.
Bəyanatda qeyd edilir ki, ADP ölkədə siyasi fəallığı yüksəltmək, vətəndaşları cəmiyyətin siyasi həyatında fəal iştiraka təşviq etmək və bələdiyyələrdə təmsil olunmaqla yerli problemlərin həllində iştirak etmək məqsədi ilə fərdi təşəbbüs qaydasında bələdiyyə seçkilərində iştirak etmək haqqında qərar qəbul edir, öz üzv və tərəfdarlarını qarşıdan gələn bələdiyyə seçkilərində fəal iştirak etməyə çağırır.
"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları 2009-cu il martın 18-də Konstitusiyaya təklif olunan əlavə və dəyişikliklərlə bağlı keçirilən referendum ərəfəsi təsis ediblər.
Məqalə müəllifi ilə əlaqə ünvanı: [email protected]