Azərbaycan, Lənkəran, 24 oktyabr / Trend , muxbir P.Əliyeva/
Azərbaycanın cənub regionunda polis bir kiloqramdan artıq narkotiki qanunsuz dövriyyədən çıxarıb. Lənkəran rayon polis şöbəsi əməkdaşlarının keçirdikləri əməliyyat tədbirləri nəticəsində narkotik maddələrin satışı ilə məşğul olan şəxs yaxalanıb.
Lənkəran rayon polis şöbəsinin istintaq bölməsinin rəisi Polad Mehdiyev Trend -a bildirib ki, şöbəyə daxil olan əməliyyat məlumatı nəticəsində axşam saatlarında rayonun Səpinəkəran kənd sakini 1962-ci il təvəllüdlü Əkbərov İmamverdi Allahverdi oğlunun üzərindən iki qutu qurudulmuş marixuana (2,31 q) aşkar edilərək götürülüb. Yaşadığı evə baxış zamanı paltarların arasından üç qutuda 9,43 qr, həyətdəki ot tayasının içində gizlədilmiş 5 kiloqramlıq düyü kisəsində isə 1 kq 31 qr qurudulmuş marixuana aşkar edilərək istintaqa təhvil verilib.
Ələkbərov dindirilmə zamanı marixuananı satış məqsədi ilə həyətində əkib becərdiyini, iki ildən artq bu işlə məşğul olduğunu etiraf edib. Təqsirləndirilən şəxs barəsində həbs qəti imkan tədbiri seçilib.
Faktla bağlı Lənkəran rayon polis şöbəsində Cinayət Məcəlləsinin 234-cü maddəsi ilə cinayət işi başlanıb. Araşdırmalar davam etdirilir.
Məqalə müəllifi ilə əlaqə ünvanı: [email protected]