Azərbaycan, Bakı, 18 noyabr / Trend , müxbir A.Hüseynbala/
Azərbaycanda SPİD-ə qarşı yeni qanun layihəsi dekabr ayında parlamentin müzakirəsinə çıxarılacaq.
"İmmunçatışmazlığı virusunun (AİDS-SPİD) yayılmasının qarşısını almaq üçün hazırlanan yeni qanun layihəsi rəy alınmaq üçün müvafiq nazirliklərə göndərilib. Rəylər alınandan sonra bir daha komitədə ətraflı müzakirə edib parlamentin müzakirəsinə təqdim edəcəyik", - çərşənbə günü Trend -a Milli Məclisin Sosial siyasət komitəsinin sədr müavini Musa Quliyev bildirib.
Trend -un arayışı: Azərbaycanın "İnsan immunçatışmazlığı virusunun (AİDS) törətdiyi xəstəliklərin yayılmasının qarşısının alınması haqqında" qanunu 1996-cı ildə qəbul olunub. MDB ölkələri arasında bu problemlə mübarizəyə dair qanunu ilk qəbul edən dövlət Azərbaycandır.
Quliyevin sözlərinə görə, komitə layihəni dekabr ayında parlamentin müzakirəsinə təqdim edəcək.
"Dünyada həm qanunvericilik praktikası, həm bu xəstəliyə münasibət dəyişdiyindən, həm də müalicəsi, diaqnostikası və ona qarşı hüquqi tədbirlərin görülməsi sahəsində çox böyük təcrübə toplanıldığından, Azərbyacanda yeni qanunun qəbuluna ehtiyac yaranıb", - millət vəkili əlavə edib.
Komitə sədrinin müavini deyib ki, əgər 1996-ci ildə ölkədə cəmi iki nəfər SPİD-li xəstə olubsa, indi onların sayı 1500-ə çatmaqdadır.
"Bütün bunlara görə qanunvericiliyin daha da genişləndirilməsi zəruridir. Çünki dünyada SPİD-li xəstələrə münasibət dəyişib, belə insanlara humanist münasibət formalaşıb və bu xəstəliyə yoluxma heç də qripə yoluxmadan sürətli və təhlükəli deyil", - Quliyev vurğulayıb.
Quliyevin sözlərinə görə, yeni qanunda SPİD-li xəstələrə qarşı ölkədə təcridolunma hallarına yol verilməməsi nəzərdə tutulur. "Bu virusun aşkar olunduğu şəxslərə ictimai həyatın heç bir sahəsində məhdudiyyətlərə yol verilməyəcək. Əgər kimsə məhdudiyyətə cəhd göstərərsə, onlara qarşı inzibati, yaxud digər cəza tədbirləri nəzərdə tutulacaq. SPİD-li şəxs xəstə kimi başqasını da yoluxdurduğunu bilərək düşünülmüş addım atarsa, onda həmin şəxsə qarşı cinayət məsuliyyəti tətbiq olunacaq", - komitə sədrinin müavini deyib.
Məqalə müəllifi ilə əlaqə ünvanı: [email protected]