Azərbaycan, Bakı, 07 yanvar / Trend , müxbir S.Ağayeva/
Azərbaycan və Qətər "Diplomatik və xüsusi pasportlara malik vətəndaşların vizasız gediş-gəlişi haqqında" müqavilə imzalayacaqlar. Sənəd Azərbaycanın xarici işlər naziri Elmar Məmmədyarovun yanvarın 11-12-nə nəzərdə tutulmuş Qətərə səfəri zamanı imzalanacaq. Bu barədə cümə axşamı Qətərin Bakıdakı səfirliyindən Trend -a deyilib.
Səfər zamanı Azərbaycan və Qətər arasında siyasi və iqtisadi sahələrdə əməkdaşlıq perspektivlərinin müzakirə olunacağı gözlənilir. Azərbaycanın xarici işlər naziri ölkənin rəsmi şəxsləri ilə bir sıra görüşlər keçirəcək.