Azərbaycan, Bakı, 15 yanvar / Trend , müxbir A.Hüseynbala/
Azərbaycan Parlamentində mədəniyyət haqqında yeni qanun layihəsi hazırlanır.
"Mədəniyyət haqqında" qanun qəbul olunan zaman ölkəmizdə maddi imkanlar indiki yüksək səviyyədə olmadığından, mədəniyyət və incəsənət sahələrinin daha çox maliyyələşdirilməsi ilə bağlı müddəalar yeni layihədə əksini tapacaq", - cümə günü Trend -a Milli Məclisin Mədəniyyət komitəsinin sədri Nizami Cəfərov bildirib.
"Mədəniyyət haqqında" qanun 1998-ci ildə qəbul edilib. Ancaq Parlament yeni qanunun qəbuluna ehtiyac duyur.
Cəfərovun sözlərinə görə, "Mədəniyyət haqqında" yeni qanun layihəsi hazırlandığından, yaradıcı təşkilatlarla bağlı xüsusi qanunun qəbuluna da ehtiyac qalmayacaq. "Həmin məsələlər də bu layihədə öz əksini tapacaq. Çünki yaradıcı təşkilatlar hesab olunan Yazıçılar Birliyinin, Bəstəkarlar və Rəssamlar ittifaqlarının maliyyələşdirilməsi getsə də, bunun qanunvericilik mexanizmi yoxdur. Yeni layihədə bu məsələyə də ciddi fikir verəcəyik", - komitə sədri əlavə edib.
Onun fikrincə, əsas məsələ prodüserlərlə bağlıdır. "İncəsənət indi bazar prinsipləri ilə fəaliyyət göstərir", - o deyib.
"Sənət adamı öz əsərini satmaq texnologiyasını bilmir. İncəsənətin inkişafı üçün prodüser sisteminin inkişaf etməsinə də ciddi ehtiyac var. Biz çalışacağıq ki, bu və digər problemli məsələlər "Mədəniyyət haqqında" yeni qanunda tam əhatə olunsun", - Cəfərov vurğulayıb.
Komitə sədri layihənin müzakirə üçün parlament sessiyasının gündəliyinə salınacağını da istisna etmir.
Məqalə müəllifi ilə əlaqə ünvanı: [email protected]
