...

AKP hökuməti ilə ordu arasında gizli razılaşma var - türkiyəli analitik

Siyasət Materials 1 Mart 2010 16:54 (UTC +04:00)
Türkiyənin Səadət Partiyasından olan keçmiş millət vəkili, professor Mehmet Bekaroğlu hesab edir ki, Türkiyədəki "BALYOZ" dövlət çevrilişinə hazırlıq planı ilə bağlı keçirilən həbslərdə hakim Ədalət və İnkişaf Partiyası ilə Türkiyə Ordusunun Baş Qərargah rəisi İlker Başbuğ arasında gizli razılaşma var.
AKP hökuməti ilə ordu arasında gizli razılaşma var  - türkiyəli analitik

Azərbaycan, Bakı, 01 mart / Trend , müxbir R.Hafizoğlu/

Türkiyənin Səadət Partiyasından olan keçmiş millət vəkili, professor Mehmet Bekaroğlu hesab edir ki, Türkiyədəki "BALYOZ" dövlət çevrilişinə hazırlıq planı ilə bağlı keçirilən həbslərdə hakim Ədalət və İnkişaf Partiyası ilə Türkiyə Ordusunun Baş Qərargah rəisi İlker Başbuğ arasında gizli razılaşma var.

"Türkiyədə "BALYOZ" hərbi şevriliş planına qarşı keçirilən əməliyyatlar AKP hökuməti ilə Ordu Baş Qərargah rəisi İlker Başbuğ arasında gizli razılaşma əsasında həyata keçirilir", - deyə Bekaroğlu bazar ertəsi Ankaradan telefonla Trend -a bildirib.

Trend -un arayışı: Türkiyənin iqtidaryönlü "TARAF" qəzetinin iddiasına görə, Türkiyə Silahlı Qüvvələri ölkə hakimiyyətini devirmək üçün "Balyoz" adlı xüsusi plan hazırlayıb. Hazırlanan plana əsasən, İstanbuldakı "Fatih Camisi" və "Bəyazid" məscidlərini cümə namazı zamanı partlatdıqdan, ölkənin hərbi muzeyinə hücum təşkil etdikdən, Türkiyə Hərbi Hava Qüvvələrinə məxsus bir neçə qırıcı təyyarəni partladaraq bunu yunan tərəfinin üzərinə atdıqdan sonra Türkiyə Silahlı Qüvvələri ölkədə yaranacaq xaosdan istifadə edərək hakimiyyəti devirəcəkdi. Qəzetin iddiasına görə, planın hazırlanmasında və həyata keçirilməsində Türkiyə Silahlı Qüvvələrinin sabiq generalı Çetin Doğanın imzası var və plan 2002-2003-cü illərdə hazırlanıb. İddiaya görə, Türkiyədə hərbi çevrilişdən sonra kütləvi həbslər başlanmalı idi.

Fevralın 22-də Türkiyədə "BALYOZ" dövlət çevrilişi planına qarşı keçirilən əməliyyatlar zamanı Türkiyə Silahlı Qüvvələri Baş Qərargah rəisinin keçmiş müavini, 1-ci Ordunun sabiq komandanı, istefada olan ordu generalı Ergin Sayqun və keçmiş ordu generalı Çetin Doğan polis tərəfindən həbs edilib. Həbs olunan ordu rəsmiləri ifadələri alındıqdan sonra sərbəst buraxılıb.

Bekaroğlu onu da qeyd edib ki, əslində bu gün Türkiyədə baş verən hadisələr heç də zahirdə göründüyü kimi deyil və ölkə ciddi dəyişikliyə doğru addımlayır.

"Artıq dünya ordunun istədiyi vaxt hərbi çevriliş etdiyi və siyasətə müdaxilə etdiyi bir Türkiyəni qəbul etmir və məhz elə buna görə də ölkə demokratikləşmək məcburiyyətindədir", - o əlavə edib.

Bekaroğlunun sözlərinə görə, həm hakimiyyət, həm ordudakı bəzi rəsmilər və ölkə xaricindəki güclər ölkənin demokratikləşməsini istəyirlər.

Keçmiş millət vəkili onu da əlavə edib ki, Ərdoğan hakimiyyəti ilə İlker Başbuğdan əvvəlki Türkiyə Ordusunun Baş Qərargah rəisi Yaşar Böyükanıt arasında da demokratikləşmə və ordunun siyasətdən ayrılması üçün razılaşma var idi.

Bekaroğlu hesab edir ki, əgər AKP anti-terror əməliyyatı çərçivəsində ordu rəsmiləri ilə əməkdaşlıq etməsəydi və ortada bir razılaşma olmasaydı, ordu rəsmilərinin həbsi qeyri mümkün olardı.

"Hazırda Türk ordusunda hələ də ölkənin daxili və xarici siyasətinə müdaxilə etmək istəyən qüvvələr var. Lakin unutmamaq lazımdır ki, dünyanın heç bir demokratik ölkəsində ordu dövlət siyasətinə müdaxilə etmir", - o qeyd edib.

Bekaroğlu onu da qeyd edib ki, keçirilən anti-terror əməliyyatlarını AKP-nin ordudan qisası kimi yox, ordunun demokratik bir ordu halına gətirilməsi prosesi kimi dəyərləndirmək lazımdır.

Ekspert hesab edir ki, gələcəkdə də Türkiyə Ordusunun Baş Qərargah rəisi postunu kimin tutacağından asılı olmayaraq, ordunun siyasətdən ayrılması prosesi davam etdiriləcək.

"Türkiyədə bundan əvvəlki hərbi çevrilişlərin istisnasız olaraq hamısı ABŞ hökumətinin dəstəyi və razılığı əsasında həyata keçirilib. Hazırda hərbi çevrilişin olmaması, çevriliş cəhdlərinin qarşısının alınması onu göstərir ki, Vaşinqton da hərbi çevrilişin baş verməsində maraqlı deyil", - o bildirib.

Bekaroğlunun fikrincə, ordu rəsmilərinin həbsi ölkədə bir az daxili çaxnaşma yarada bilər, lakin bu uzun müddətli olmayacaq.

"Ordu rəsmilərinin həbsi AKP-nin gələcək seçkilərdəki səs sayına təsir edə bilər. Lakin həbslər ölkədə daxili xaosa yol açmayacaq", - o bildirib.

Xəbər lenti

Xəbər lenti