Azərbaycan, Bakı, 26 aprel /Trend, müxbir A.Hüseynbala/
Azərbaycanın müxalifət partiyasının gənclər təşkilatı aprelin 30-da keçirilməsi nəzərdə tutulan mitinqdə təhsil, gənclər və idman nazirlərinin də iştirakını arzulayır.
"Azərbaycan Dövlət Neft Akademiyasındakı terror hadisəsi zamanı həlak olanların və zərərçəkənlərin əksəriyyətinin tələbələr və gənclər olduğunu nəzərə alaraq, təhsil naziri Misir Mərdanovun, gənclər və idman naziri Azad Rəhimovun aprelin 30-da keçirəcəyimiz aksiyada iştirak etmələrini arzu edirik", - bazar ertəsi Trend-ə Müsavat Partiyasının mətbuat xidmətindən bildirilib.
Partiyanın gəncləri hər iki nazirin aksiyada iştirakına ümid etdiyini qeyd edib.
Müsavat Partiyasının Gənclər Təşkilatı ötən həftə aprelin 30-da saat 13:00-dan 15:00-a qədər Azərbaycan Dövlət Neft Akademiyasında törədilən terror hadisəsinini ildönümü ilə əlaqədar Cəfər Cabbarlı meydanı qarşısında "Tələbə həmrəylik günü" elan edilməsi və ali məktəbdə faciəli şəkildə qətlə yetirilənlərin xatirəsinə abidə ucaldılması tələbləri ilə mitinq keçirməyi qərara alıb.
2009-cu il aprelin 30-da Azərbaycan Dövlət Neft Akademiyasına odlu silahla hücum edən Fərda Qədirov 12 nəfəri öldürüb, 13 nəfəri isə yaralayıb.
Həmin cinayət işi üzrə 4 nəfər həbs olunub və barələrindəki cinayət işinin istintaqı yekunlaşdırılaraq, baxılması üçün məhkəməyə göndərilib.
