Bu günlərdə Nyu-Yorkda birləşmiş millətlər tərəfindən İkinci Dünya Müharibəsində Qələbənin 65 illiyi təntənəli şəkildə qeyd edilir, Azərbaycan Respublikasının BMT yanında Daimi Nümayəndəliyinin press relizində deyilir.
Nəzərdə tutulmuş tədbirlər çərçivəsində BMT-nin qərərgahında müharibə mövzusunda kinofilmlər nümayiş etdirilmiş, "Biz bir yerdə qələbə çaldıq" adlı foto-sərgi təşkil olunmuş, Azərbaycan və digər MDB iştirakçı ölkələrindən olan ifaçıların iştirakı ilə təntənəli konsert keçirilmişdir.
6 may tarixində BMT Baş Assambleyasının xüsusi plenar iclasında Azərbaycan Respublikasının BMT yanında Daimi Nümayəndəsi, Fövqəladə və Səlahiyyətli Səfir, cənab Aqşin Mehdiyev çıxış etmişdir. Çıxışında Azərbaycanın diplomatik missiyasının rəhbəri faşizm üzərində qələbəyə nail olmaq üçün ölkəmizin verdiyi töhvəni qeyd etmiş, həmçinin, müharibə illərində cəbhədə yüzminlərlə həmyerlimizin savaşdığını və onlardan təxminən beş yüz mininin qələbə naminə həyatlarını qurban verdikləriini bildirmişdir. A.Mehdiyev, Bakının neft istehsalı üzrə dünya mərkəzlərindən biri olaraq, müharibə zamanı Sovet ordusunun neftə olan tələbatının təxminən 70%-ini ödədiyinə xüsusi diqqəti yönəltdi. 1941-1945-ci illər ərzində beş yüz mindən artıq yaralılar Azərbaycan tibb müəssisələrində müalicə almışlar.
A.Mehdiyev həmvətənlərimizin göstərdiyi qəhrəmanlıq və igidliyə görə ən yüksək dövlət mükafatlarına layiq görüldüklərini vurğulamışdır.
Azərbaycanın Daimi Nümayəndəsi təəssüflə qeyd etmişdir ki, beynəlxalq ictimaiyyətin bəzi nümayəndələri tarixin acı dərsindən bu günədək nəticə çıxarmamış və beynəlxalq hüququn prinsip və normalarıını pozmağa və dövlətlərin suverenliyi və ərazi bütövlüyünə hörmət etməməyə davam edirlər.
Eyni zamanda A.Mehdiyev beynəlxalq sülhün və təhlükəsizliyin qorunmasında, insan hüquqları və əsas azadlıqlarının müdafiəsində BMT-nin vacib rolunu vurğulamış və BMT səmərəliliyinin gücləndirilməsinin zəruriliyini qeyd etmişdir.
Həmin gün İkinci Dünya Müharibəsində Qələbənin 65 illiyi münasibəti ilə təşkil edilmiş rəsmi ziyafətdə BMT Baş katibi, digər beynəlxalq təşkilatların rəhbərləri, BMT-yə üzv dövlətlərin Daimi Nümayəndələri, müharibə veteranları, ictimai təşkilatların və kütləvi informasiya vasitələrinin nümayəndələri iştirak etmişlər.
...