Azərbaycan Respublikasının İran İslam Respublikasındakı səfirliyində ümummilli lider Heydər Əliyevin anadan olmasının 87-ci ildönümü münasibəti ilə mərasim təşkil edilmişdir. Məlumatı AzərTAc dövlət agentliyi yayıb.
Mərasimdə Türkiyə, Ukrayna, Belarus, Qırğızıstan, Tacikistan respublikalarının İrandakı səfirləri, Tehranda fəaliyyət göstərən diplomatik korpusun təmsilçiləri, şəhər ictimaiyyətinin nümayəndələri iştirak ediblər. Heydər Əliyevin büstü önünə əklillər və gül çələngləri düzülmüş, əziz xatirəsi ehtiramla yad edilmişdir.
Əvvəlcə Heydər Əliyevin ruhuna dualar oxunmuş, Azərbaycan Respublikasının dövlət himni səsləndirilmiş, ulu öndərin həyat və fəaliyyətini əks etdirən film göstərilmişdir.
Mərasimi giriş sözü ilə açan səfir Cavanşir Axundov Heydər Əliyevin yarım əsrədək dövrü əhatə edən məqsədyönlü siyasi fəaliyyətindən danışmış, ulu öndərimizin Azərbaycanı hərtərəfli inkişaf etdirmək, ölkəmizi və xalqımızı dünyada tanıtmaq, insanlara qayğı göstərmək, xalqlar arasında mehriban münasibət yaratmaq istiqamətində yürütdüyü siyasətdən bəhs etmişdir. Heydər Əliyevin xilaskarlıq missiyasından söz açan səfir bildirmişdir ki, ümummili liderimizin həyata keçirdiyi mehriban dostluq və qonşuluq siyasəti Azərbaycan-İran münasibətlərinin müsbət istiqamətdə inkişafının təməlini qoymuşdur. Bu uzaqgörən siyasət Prezident İlham Əliyev tərəfindən uğurla davam etdirilir.
Tanınmış cərrah, görkəmli ictimi xadim, Cavad Heyət, İran-Azərbaycan Dostluq Cəmiyyətinin sədri, İranın Azərbaycanadakı keçmiş səfiri Əhəd Qəzayi, Türkiyə, Qırğızıstan və Tacikistanın səfirləri, digər natiqlər ulu öndərimiz haqqında maraqlı xatirələrini iştirakçılarla bölüşmüşlər.
Mərasimdə Heydər Əliyevin həyat və fəaliyyətini əks etdirən, müxtəlif dillərdə nəşr edilmiş kitablar nümayiş etdirilmiş, iştirakçılara ulu öndərimizin tərcümeyi-halı barədə məlumat paylanmışdır.
Trend-in ən mühüm və maraqlı xəbərlərini "Telegram"da izləyin
.jpg)
.jpg)
