Azərbaycan, Bakı, 2 iyun /Trend, müxbir A.Qasımova/
ABŞ Prezidenti Barak Obama Azərbaycan Prezidenti İlham Əliyevə 28 May - Respublika Günü münasibətilə təbrik məktubu göndərib.
"28 May - Respublika Günü münasibətilə bütün Amerika xalqı adından Sizi və Azərbaycan vətəndaşlarını təbrik edirəm", - məktubda deyilir.
Məktubda bildirilir ki, "qlobal hədələrə qarşı mübarizə aparılması, regional sabitliyin gücləndirilməsi və ümumi təhlükəsizlik problemlərinin aradan qaldırılmasında iki ölkə arasındakı tərəfdaşlıqdan qürur hissi duyuram. Əməkdaşlıq üçün yeni imkanları inkişaf etdirdiyimiz bir vaxtda, gələn aylar və illər ərzində həmin tərəfdaşlığın dərinləşməsinə ümid edirik. Birləşmiş Ştatlar Azərbaycan hökuməti və xalqı ilə möhkəm münasibətləri yüksək qiymətləndirir və həm regionda, həm də dünyada sabitliyə töhfə verən çiçəklənən və demokratik dövlət kimi Azərbaycanın suverenliyi və inkişafına sadiq qalır".
