Azərbaycan, Bakı, 30 iyul /Trend, müxbir T.Hacıyev/
Azərbaycanın müxalif Ümid Partiyası heç bir seçki blokuna qoşulmayacaq. Bu barədə cümə axşamı Trend-ə Ümid Partiyasının sədri İqbal Ağazadə bildirib.
"Ona görə ki, Ümid Partiyası cəmiyyətdəki yeri və çəkisinə, siyasi proseslərə yanaşmasına, parlament seçkilərində iştirak edən üzvlərinin sayına görə digər partiyalarla müqayisədə çox irəlidədir. Müxalifət partiyaları arasında bu sahədə irəlidə olan ikinci bir partiya yoxdur. Ya hansısa blokun yaradıcılarından biri olacağıq, ya da heç bir blokda olmayacağıq. Bizim yaranan hər hansı bloka sonradan qoşulmaq fikrimiz yoxdur", - Ağazadə əlavə edib.
Ümid Partiyası 1993-cü ildə təsis edilib. Partiyanın ilk sədri Əbülfət Əliyev olub. 2002-ci ildə partiya Vətəndaş Birliyi Partiyası (VBP) ilə birləşib. 2002-ci il dekabrın 15-də Ümid Partiyasının III Qurultayında partiyanın sədri İqbal Ağazadə seçilib.
Partiya sədri qeyd edib ki, Ümid Partiyası əməkdaşlığa da hazırdır.
"Azərbaycanda demokratik seçkilər naminə hər kəslə əməkdaşlığa hazırıq. Biz istəsək də, istəməsək də seçki prosesində digər partiyalarla əməkdaşlıq edəcəyik", - Ağazadə bildirib.
Azərbaycanda parlament seçkilərinin 2010-cu il noyabrın 7-də keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində keçirilir.
