Аzərbaycan, Bakı, 24 avqust /Trend, müxbir Ü.Sadıxova/
Türkiyə NATO karvanının öz sərhədi vasitəsilə Ermənistana keçməsinə razılıq verməsə, NATO-nun 11-17 sentyabr üçün nəzərdə tutulmuş təlimləri ləğv oluna bilər. Bu barədə Türkiyə XİN-in Avrasiya ölkələri üzrə departamentinin rəhbəri Mehmet Fatih Ceylan bildirib.
"Nəzəri olaraq Türkiyə lazımi avadanlıqların buraxılışı üçün icazə verməyə və sərhədi açmaya bilər. Lakin bu, təbii fəlakətlə mübarizəyə hazırlıq üçün FHN-in hərbi xarakter daşımayan təlimləri olacaq", - türkiyəli diplomatı Trend-ə telefon vasitəsilə bildirib.
Onun sözlərinə görə, əgər NATO Ermənistanda təlim üçün Türkiyə ərazisindən hərbi-texniki avadanlıqlar keçirmək niyyətində olsaydı, Ankara buna icazə verməzdi. "Təlimlərin FHN çərçivəsində keçiriləcəyini nəzərə alaraq, Türkiyə təlimlər üçün NATO avadanlıqlarının keçirilməsi məqsədilə müvəqqəti olaraq sərhədi açacaq", - Ceylan deyib.
"Ssenari belədir ki, Ermənistanda zəlzələ baş verir və NATO qüvvələri lazımi yardım göstərmək üçün oraya yollanır", - Ceylan "belə təlimlərin keçirilməsi üçün Türkiyə təşkilatın üzvü kimi NATO qüvvələrini öz sərhədindən keçirməyə bilməz" fikrini əlavə edərək bildirib. "Lakin mövcud addım Türkiyənin Ermənistanla sərhədi rəsmi şəkildə açdığını söyləmir", - diplomat bildirib.
Ölkələr arasında sərhədlər 1993-cü ildə Yerevanın qondarma "erməni soyqırımı"nın dünyada tanınması üçün iddiaları və Ermənistan Silahlı Qüvvələrinin Azərbaycan ərazisini işğalı ilə əlaqədar olaraq bağlanıb.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağın və işğal olunmuş ərazilərin azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.