Azərbaycan, Bakı, 31 avqust /Trend, müxbir T.Hacıyev/
Azərbaycanın Klassik Xalq Cəbhəsi Partiyası müxalifətin aksiyalarına qoşulmaq niyyətində deyil. Bu barədə çərşənbə axşamı Trend-ə Klassik Xalq Cəbhəsi Partiyasının sədri Mirmahmud Mirəlioğlu bildirib.
"Azərbaycan Xalq Cəbhəsi Partiyası üzvləri özlərinə vurulublar və gözləri başqa heç nəyi görmür. Biz AXCP-nin də iştirak edəcəyi hər hansı aksiyada iştirak etməyəcəyik", - Mirəlioğlu bildirib.
Mirəlioğlunun sözlərinə görə, partiyasının təmsil olunduğu Demokratiya Uğrunda İttifaqda (DUİ) da bu məsələ müzakirə mövzusu deyil.
Bir neçə gün öncə Azərbaycanın müxalif Müsavat və Xalq Cəbhəsi partiyaları kütləvi aksiyaların bərpa olunması barədə qərar qəbul edib. Müsavat Partiyası mərkəzi icra aparatının rəhbəri Arif Hacılı çərşənbə axşamı Trend-ə açıqlamasında Klassik Xalq Cəbhəsinin də bu aksiyalarda iştirakını arzu etdiyini bildirib.
"Bizim kütləvi aksiyalar keçirmək üçün kifayət qədər qüvvəmiz var. Etiraz aksiyalarını kiminləsə birlikdə keçirmək barədə fikrimiz yoxdur. Belə bir məsələ müzakirə olunmayıb", - Mirəlioğlu bildirib.
