Azərbaycan, Bakı, 12 oktyabr /Trend, müxbir T.Cəfərov/
Noyabrda Bakıda Xəzəryanı ölkələrin dövlət rəhbərlərinin üçüncü sammitinin keçirilməsi tərəflərin Xəzər mövzusu ətrafında problemli məsələlərdə mövqelərinin yaxınlaşmasını sübut edir. İran Prezidentinin Xəzər məsələləri üzrə xüsusi nümayəndəsi, xarici işlər nazirinin müavini Məhəmməd Mehdi Axundzadə belə hesab edir.
"Xəzərin hüquqi statusunun müəyyənləşdirilməsi məsələsi çox vacibdir və bu, vahid mövqe əsasında həll edilməlidir", - Trend-ə çərşənbə axşamı Axundzadə bildirib.
İran Prezidentinin xüsusi nümayəndəsinin fikrincə, dənizin statusunun müəyyənləşməsi məsələsinin yubanması tərəflərin indiyədək öz mövqelərini razılaşdırmamaları ilə əlaqədardır.
"Xəzəryanı ölkələrdə məsələnin həlli üçün siyasi iradə var", - o qeyd edib.
Axundzadə ümid etdiyini bildirib ki, Tehranda Xəzəryanı ölkələrin XİN müavinlərinin qarşıdan gələn görüşündə mübahisəli məsələlərin 30 faizi öz həllini tapacaq.
Çərşənbə axşamı Bakıda Xəzəryanı ölkələrin xarici işlər nazirlərinin müavinlərinin görüşü başlayıb.
Xəzəryanı dövlətlər 2003-cü ilin noyabrında Xəzərdə dəniz mühitinin qorunması üzrə Çərçivə Konvensiyasını imzalayıblar.
1998-ci ilin iyulunda Qazaxıstanla Rusiya arasında yeraltı sərvətlər üzrə suveren hüquqların həyata keçirilməsi məqsədi ilə Xəzərin şimal hissəsində dəniz dibinin bölünməsi haqqında saziş imzalanıb, 2002-ci ilin mayında isə həmin sazişə müvafiq protokol imzalanıb.
2001-ci il noyabrın 29-da və 2003-cü il fevralın 27-də Qazaxıstanla Azərbaycan arasında Xəzər dənizinin dibinin bölünməsi haqqında saziş və ona müvafiq protokol imzalanıb.
Həmçinin, 2003-cü il mayın 14-də Qazaxıstan, Azərbaycan və Rusiya arasında Xəzər dənizinin həmsərhəd hissələrinin bölünməsi xəttinin qovuşma nöqtəsinə dair saziş imzalanıb.
