Azərbaycan, Bakı, 14 oktyabr /Trend, müxbir M.Əliyev/
Azərbaycanda Parlament seçkilərində iştirak edən siyasi partiyalar və siyasi partiyaların blokları emblemlərini iki gün ərzində Mərkəzi Seçki Komissiyasına göndərməlidirlər. Bu barədə MSK-nın cümə axşamı yaydığı məlumatda deyilir.
Məlumatda deyilir ki, Azərbaycan Milli Məclisinə seçkilərdə seçki bülletenləri hazırlanarkən, Azərbaycan Respublikası Seçki Məcəlləsinin 54-cü maddəsinə uyğun irəli sürülərək qeydə alınmış deputatlığa namizədlər barədə digər məlumatlarla yanaşı, həmin namizədlərin mənsub olduqları siyasi partiyanın emblemi də göstərilməlidir.
Azərbaycanda Parlament seçkiləri noyabrın 7-də keçiriləcək. Bundanəvvəlki seçkilər 2005-ci ilin noyabr ayında keçirilib. Azərbaycanda Parlament seçkiləri majoritar sistem üzrə 125 seçki dairəsində aparılır.