Azərbaycan, Bakı, 2 noyabr /Trend, müxbir K.Zərbalıyeva/
Bakıda NATO-nun Ali Birləşmiş Transformasiya Komandanlığı Qərargahının ekspert qrupu tərəfindən Silahlı Qüvvələrin hərbi təhsil müəssisələrində "NATO günləri" keçirilir.
Müdafiə Nazirliyinin mətbuat xidmətinin rəis müavini Teymur Abdullayev çərşənbə axşamı Trend-ə bildirib ki, noyabrın 1-dən 5-dək keçirilən tədbirin məqsədi Azərbaycanın hərbi təhsil müəssisələrinin dinləyicilər, müəllim və komandanlıq heyətinə NATO-nun inkişaf tarixi, hazırkı quruluşu, siyasəti, strategiyası, yeni strateji konsepsiyası, Tərəfdaşlıq münasibətləri və Sülhməramlı əməliyyatları haqqında mühazirələrin oxunması və dəyirmi masa müzakirələrinin aparılmasıdır.
Nazirlik rəsmisi bildirib ki, tədbir zamanı NATO ekspert qrupu tərəfindən "NATO-nun Strateji Planlama siyasəti" və "NATO-nun təşkilati strukturu və NATO-da transformasiyaya yanaşma" mövzularında brifinqlər keçiriləcək və dəyirmi masalar təşkil ediləcək.
Eyni zamanda, Azərbaycan nümayəndələri tərəfindən "Azərbaycan-NATO əməkdaşlığı" mövzusunda brifinq keçiriləcək.
Azərbaycan və NATO arasında əməkdaşlığın əsası 1994-cü il mayın 4-də "Sülh naminə tərəfdaşlıq proqramı" - çərçivə sənədinin imzalanması ilə qoyulub.
Azərbaycan 2005-ci ildən NATO ilə ikiillik müddətə hesablanan "Fərdi Tərəfdaşlıq üzrə Fəaliyyət Planı" çərçivəsində əməkdaşlıq edir. Hazırda əməkdaşlıq 2008-2010-cu illəri əhatə edən "Azərbaycan Respublikasının NATO ilə Fərdi Tərəfdaşlıq üzrə Fəaliyyət Planı"nın ikinci mərhələsi çərçivəsində həyata keçirilir.
Əməkdaşlığın əsas istiqamətlərinə silahlı qüvvələr üzərində tam demokratik nəzarətin yaradılması, müdafiə planlaşdırması və müdafiə büdcəsinin formalaşdırılması, NATO-nun norma və standartlarından istifadə etməklə silahlı qüvvələrin bütün strukturlarının yenidən qurulması daxildir.
1999-cu ildən etibarən Azərbaycanın hərbi kontingenti NATO-nun Kosova, İraq, 2002-ci ildən isə Əfqanıstanda sülhməramlı əməliyyatların keçirilməsinə dəstək verib.