Azərbaycan, Bakı, 5 Noyabr /Trend, müxbir T.Hacıyev/
Azərbaycanın müxalif AXCP-Müsavat siyasi partiyalar blokunun planlaşdırılan kütləvi aksiyasına Vətəndaş Həmrəyliyi Partiyası (VHP) da qoşula bilər. Bu barədə cümə günü Trend-ə VHP-nin sədri Sabir Rüstəmxanlı məlumat verib.
"Parlament seçkilərinin nəticələrini gözləyəcəyik. Yerlərdə, seçki komissiyalarında olan müşahidəçilərimizin məlumatı əsasında atacağımız addımları planlaşdıracağıq. Ola bilər ki, aksiyaları birlikdə keçirək", - Rüstəmxanlı əlavə edib.
Partiya sədri qeyd edib ki, bu ölkə hamımıza aiddir və problemlərə qarşı birgə mübarizə aparmalıyıq.
Azərbaycanın müxalif AXCP-Müsavat siyasi partiyalar bloku noyabrın 9-da kütləvi aksiya keçirməyi planlaşdırır. Bununla əlaqədar Bakı şəhər İcra Hakimiyyətinə müraciət ünvanlanıb. Müraciətdə aksiyanın keçirilməsi üçün metronun Elmlər Akademiyası stansiyası yaxınlığındakı Hüseyn Cavid bağı, Nəriman Nərimanov stansiyasının yaxınlığındakı meydan və digər yerlər təklif olunub.
Azərbaycanda parlament seçkiləri noyabr ayının 7-də keçiriləcək. Sentyabrın 3-də seçkilərə rəsmi start verilib.
Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində aparılır.
Müsavat Partiyasının Mərkəzi İcra Aparatının rəhbəri Arif Hacılı Trend-ə açıqlamasında VHP-nin kütləvi tədbirdə iştirakına etiraz etmədiyini bildirib.
Bakı şəhər İcra Hakimiyyətinin İctimai təşkilatlar və siyasi partiyalarla iş şöbəsinin müdiri Zaur Ramazanov cümə günü Trend-ə açıqlamasında qeyd edib ki, AXCP-Müsavat siyasi partiyalar bloku tərəfindən müraciət noyabrın 4-ü axşam daxil olub və hazırda ona baxılır.