Qazaxıstan, Astana, 12 noyabr /Trend, müxbir A.Maratov/
Qazaxıstan və Türkmənistan XİN-lərarası məsləhətləşmələr çərçivəsində, ATƏT və ikitərəfli əməkdaşlıq çərçivəsində qarşılıqlı fəaliyyəti müzakirə ediblər. Bu barədə Qazaxıstan XİN məlumat verib.
"Keçirilən məsləhətləşmələr Astana və Aşqabadın razılaşdırılmış mövqelərinin işlənməsi və ümumregional maraqlar nəzərə alınmaqla, təşkilat çərçivəsində konsensusun yaranması üçün böyük önəm kəsb edir", - XİN-in məlumatında deyilir.
Görüş nazir müavinləri səviyyəsində keçirilib. Qazaxıstan tərəfini bu ölkənin xarici işlər nazirinin müavini Kayrat Sarıbay təmsil edib.
"Tərəflər dekabrın 1-2-də Astanada keçiriləcək ATƏT sammitinə hazırlığı ətraflı müzakirə ediblər. Tərəflər Qazaxıstan və Türkmənistanın ATƏT çərçivəsində yüksək səviyyədə müzakirə olunacaq təhlükəsizliyin möhkəmləndirilməsi, terrorizmlə, ekstremizm və insan alveri ilə mübarizə məsələlərində oxşar yanaşmasını qeyd ediblər", - məlumatda bildirilir.
İkitərəfli formatda qarşılıqlı fəaliyyətə toxunan tərəflər ticari-iqtisadi əməkdaşlığı, tranzit-nəqliyyat və karbohidrogenlərin nəqli sahəsində fəaliyyəti, eləcə də Qazaxıstan-Türkmənistan dövlət sərhədlərinin demarkasiyası üzrə görülən işləri müsbət qiymətləndiriblər.
