Azərbaycan, Bakı, 2 dekabr /Trend, müxbir T.Hacıyev/
Azərbaycanın müxalif partiya sədrləri "Xalq parlamenti"ni müzakirə ediblər.
Azərbaycanın müxalif Xalq Cəbhəsi (AXCP) və Demokrat (ADP) partiyalarının sədrləri Əli Kərimli və Sərdar Cəlaloğlu arasında görüş keçirilib. Bu barədə cümə axşamı ADP-nin mətbuat xidməti məlumat yayıb.
Görüşdə ölkədəki ictimai siyasi vəziyyət, parlament seçkilərinin nəticələrinə dair məsələlər, müxalifətin inteqrasiyası və cəmiyyət həyatının digər sferalarını əhatə edən problemlər ətrafında geniş fikir mübadiləsi aparılıb.
ADP sədri Sərdar Cəlaloğlu Trend-ə açıqlamasında bildirib ki, görüşün əsas məqsədi fikir mübadiləsi aparmaq idi. Görüşün nəticəsi olaraq hər hansı bir qərar qəbul olunmayıb.
ADP sədri Cəlaloğlu son günlər parlament seçkilərində uğur qazana bilməyən siyasi partiyaların "Xalq məclisi" yaratması ideyası ilə bağlı münasibətini bildirib.
"Mənə elə gəlir ki, biz bu cür məsələlərə kompleks yanaşmalıyıq. Ola bilsin ki, "Xalq məclisi"nə ayrı-ayrı elementin tərkib hissəsi kimi baxılsa, daha yaxşı olar. Ayrılıqda götürüləndə hər bir ideya göydən asılmış bir şey kimi olur. Ona görə də biz bu fikirdəyik ki, təkliflərin hamısına kompleks şəkildə yanaşmaq lazımdır", - Cəlaloğlu qeyd edib.
Azərbaycanda noyabrın 7-də parlament seçkiləri keçirilib.
Səsvermədə seçicilərin 50,14 faizi (2480205 seçici) iştirak edib. Seçkilərdə 690 namizəd mandate almaq uğrunda mübarizə aparıb.
Azərbaycanda parlament seçkiləri majoritar sistem üzrə 125 seçki dairəsində aparılır. Bundan əvvəlki seçkilər 2005-ci ilin noyabr ayında keçirilib.
AXCP və ADP parlament seçkilərində uğur qazana bilməyiblər.
Noyabrın 23-də Müsavat Partiyasının mərkəzi qərargahında 7 noyabr parlament seçkisinin nəticələrini tanımayan namizədlərin forumu keçirilib.
"AXCP-Müsavat" seçki blokunun təşəbbüsü ilə keçirilən forumda Milli İstiqlal, Klassik Xalq Cəbhəsi, Azadlıq, Demokratik Azərbaycan Dünyası, Azərbaycan Xalq partiyalarının təmsilçiləri və müstəqil namizədlər iştirak ediblər. Forumda parlament seçkiləri, sekçidən sonrakı vəziyyət müzakirə edilib.
Forumda həmçinin Milli Məclisə alternativ qurumun - "Xalq parlamenti"nin yaradılması təklifi səsləndirilib.
