Azərbaycan, Bakı, 9 dekabr /Trend/
Azərbaycanın Meksikadakı səfirliyi tərəfindən ispan dilində ümummilli lideri Heydər Əliyevin həyat və fəaliyyətinə həsr edilmiş İnternet səhifəsi hazırlanıb.
Səfirlikdən cümə axşamı Trend-ə verilən məlumata görə, sayt ümummilli liderin xatirəsinin yad edilməsi münasibəti ilə hazırlanıb və geniş ispandilli ictimaiyyətin diqqətinə təqdim edilib.
/www.heydar-aliyev.mx/ İnternet səhifəsində ulu öndərin bioqrafiyası, keçdiyi həyat yolu və xalqımızın gələcəyi naminə uzaqgörənliklə düşünülmüş siyasi-iqtisadi strategiyası, dünyanın məşhur siyasətçiləri və ictimai xadimlərinin Heydər Əliyev haqqında xatirələri və şəxsi fikirləri, habelə Heydər Əliyev Fondunun fəaliyyətindən bəhs edilir.
1982-ci ilin aprel ayında SSRİ-nin yüksək səviyyəli nümayəndə heyəti Heydər Əliyevin rəhbərliyi ilə Meksikaya işgüzar səfər etmişdir. İnternet səhifəsində, ulu öndərin Meksikaya səfərinə dair geniş ictimaiyyətə məlum olmayan arxiv materialları, o cümlədən Heydər Əliyevin Meksika Prezidenti ilə görüşü və səfər haqda Meksika Konqresi və digər dövlət arxivlərindən əldə edilmiş videoyazılar, fotoşəkillər və beynəlxalq mətbuat tərəfindən dərc edilmiş məqalələr yerləşdirilib.
Saytda, Azərbaycan haqqında, Heydər Əliyevin rəhbərliyi ilə ölkəmizin həyata keçirdiyi xarici siyasət kursu və beynəlxalq təşkilatlarla əməkdaşlıq tarixi, habelə Ermənistanın Azərbaycana qarşı təcavüzü və Xocalı soyqırımına dair məlumatlar yer alıb.
Yaradılmış İnternet səhifəsi bütünlüklə ispan dilində hazırlanaraq, Heydər Əliyevin həyat və fəaliyyətinə həsr edilmiş ilk ispandilli internet mənbəyidir. İnternet səhifəsi, erməni icmalarının sıx məskunlaşdığı Latın Amerikası regionunda Azərbaycan həqiqətləri barədə ispandilli mətbuatda mövcud olan informasiya boşluğunun aradan qaldırılması istiqamətində növbəti addım olub.