Azərbaycan, Bakı, 6 yanvar /Trend, müxbir N.Quliyev/
İraqda siyasi qarşıdurma və münaqişələrin çoxluğu şiələrin lideri Müqtəda Sədrin qayıtması ilə gərginləşə bilər. Bu barədə Böyük Britaniya Antiterror komitəsinin rəhbəri Kamal əl-Həlbəvi deyib.
"İraqda problemlər daha da arta və çətinləşə bilər və Müqtəda Sədrin gəlişi İraqda vəziyyəti gərginləşdirə bilər", - əl-Həlbəvi bildirib.
Üçillik fasilədən sonra şiələrin radikal rəhbəri Müqtəda Sədr İraqa qayıdıb. "Agence France-Presse"in məlumat verdiyi kimi, yanvarın 5-də onu doğma Nəcəf şəhərində qarşılayıblar.
Sədr rəhbərlik etdiyi hərbi təşkilat olan "Mehdinin ordusu"na görə böyük şöhrət qazanıb. 2003-cü ildə onun "sədrçilər" ləqəbini alan ardıcılları ABŞ-ın rəhbərlik etdiyi koalisiya qoşunları ilə hərbi qarşıdurmada iştirak etməyə başlayıblar.
Döyüşlər 2008-ci ilin avqustunda "Mehdinin ordusu"nun rəhbəri öz ardıcıllarına silahı yerə qoymağı əmr edənə qədər davam edib. Təşkilatın özü isə İraq siyasətinə əhəmiyyətli təsirini saxlayaraq buraxılmayıb.
2005-ci ildə "sədrçilər" bloku birləşmiş İraq ittifaqının tərkibində milli parlamentə keçməyə nail olub.
Əl-Həlbəvinin sözlərinə görə, İraqda problem nəinki "sədrçilər"in, eləcə də müxtəlif hərbiləşdirilmiş qruplaşmaların mövcudluğu ilə bağlıdır.
"İraqın əsas problemi ondan ibarətdir ki, bu günə qədər güclü suveren dövlət kimi formalaşmayıb", - əl-Həlbəvi deyib.