Azərbaycan, Bakı, 31 may /Trend, müxbir M.Əliyev/
Türkdilli ölkələrin Parlament Assambleyasının (TÜRKPA) beynəlxalq müşahidəçilər missiyası iyunun 12-də Türkiyədə keçiriləcək parlament seçkilərini müşahidə edəcək. Bu barədə çərşənbə axşamı Trend-ə TÜRKPA-dan bildiriblər.
Missiyanın tərkibinə Azərbaycan, Qazaxıstan, Qırğızıstan parlamentlərinin millət vəkilləri və TÜRKPA Katibliyinin əməkdaşları daxildir.
TÜRKPA beynəlxalq müşahidəçilər missiyası Türkiyədə keçiriləcək parlament seçkilərinə hazırlıq prosesini və seçkiləri Ankara şəhərində izləyəcək.
Nümayəndə heyətinin Türkiyə Xarici İşlər Nazirliyi və Mərkəzi Seçki Komissiyasında görüş keçirəcəyi də nəzərdə tutulur.
Seçkilərdən sonra TÜRKPA missiyası seçkilərin yekununa dair rəsmi hesabatını beynəlxalq təşkilatlara, həmçinin mətbuata təqdim edəcək.
Türkiyədə keçiriləcək parlament seçkilərini ATƏT və Avropa Şurasının beynəlxalq müşahidəçiləri də izləyəcək.