Azərbaycan, Bakı, 6 sentyabr /Trend, müxbir A.Tağıyeva/
Türkiyə ilə İsrail arasındakı münasibətlərin gərginləşməsi müxtəlif nəticələr doğura bilər, o cümlədən ABŞ-dakı yəhudi lobbisi konqresdə qondarma "erməni soyqırımı" məsələsini qaldıra bilər. Bu barədə Trend-ə Türkiyə ordusunun ehtiyat olan general-leytenantı Armağan Kuloğlu deyib.
Kuloğlu Ankaradan telefonla Trend-ə bildirib ki, yəhudi lobbisi İsrail-Türkiyə əlaqələrinin gərginləşməsi müqabilində bu məsələni Konqresdə qaldıra bilər.
Onun fikrincə, iki ölkə arasında əlaqələrin kəsilməsi bu ölkələrin iqtisadiyyatına da mənfi təsir göstərə bilər.
Sentyabrın 2-də Türkiyənin xarici işlər naziri Əhməd Davudoğlu bildirib ki, Türkiyə ilə İsrail arasında diplomatik münasibətlər ikinci dərəcəli səviyyəyə keçib. Bundan əlavə, Ankara Təl-Əvivlə hərbi əməkdaşlığı dayandırıb.
Nazir deyib ki, Ankara öz səfirini Təl-Əvivdən geri çağırıb. Davudoğlu onu da bildirib ki, İsrail Türkiyədən üzr istəməyincə, Təl-Əvivlə Ankara arasında münasibətlər bərpa olunmayacaq.
İsrailin Türkiyədən üzr istəməsi məsələsi Ankara üçün prinsipial, siyasi prestij məsələsi olub. Ekspert belə hesab edir.
"İsrailin Türkiyədən üzr istəməyi rədd etməsi Türkiyənin siyasi prestijinə zərər vura bilər", - Kuloğlu deyib.
Belə ki, onun fikrinə görə, Türkiya dünya ictimaiyyəti qarşısında ölkənin qələbə qazanmadığı bir vəziyyətdə nüfuzunu itirmiş halda qala bilər.
Ekspertin sözlərinə görə, nə vaxtsa daha güclü kökləri olan İsrail-Türkiyə əlaqələri Türkiyədə AKP-nin hakimiyyətə gəlməsi ilə sarsılıb. Lakin o bildirib ki, buna baxmayaraq, Türkiyə İsrail ilə strateji tərəfdaşlığı dəstəkləyən regionun az sayda ölkələrindən biri idi və əlaqələrin kəsilməsi Təl-Əvivi strateji cəhətdən əlverişsiz vəziyyətə sala bilər.
Kuloğlu Türk və İsrail Hərbi Dəniz Qüvvələrinin mümkün toqquşmasını tamamilə istisna edərək bildirib ki, Türkiyə hansısa bir ölkə ilə silahlı toqquşmaya girməmək üçün səy göstərir.
Hərbi və diplomatik sahədə son vaxtlaradək sıx əməkdaşlıq edən Türkiyə ilə İsrail arasındakı münasibətlərə ötən il mayın 31-də İsrail xüsusitəyinatlılarının Qəzza sektoruna humanitar yardım aparan gəmilərə hücum etməsindən sonra güclü zərbə dəyib. İsrail əsgərləri ilə toqquşmalar zamanı, Türkiyənin "Mavi Mərmərə" gəmisində doqquz türk fəalı həlak olub. Ankara Təl-Əvivlə münasibətlərə yenidən baxılacağını elan edib və İsraildən həlak olanların ailələrinə kompensasiyaların verilməsini tələb edib.
Ötən ilin dekabrında Türkiyənin İsrailə 41 nəfərin həyatına son qoyan və ölkə tarixində ən iri meşə yanğınları ilə mübarizə aparmaq üçün iki təyyarə göndərməsi zamanı ikitərəfli münasibətlərin bərpa olunacağına ümid yaranmışdı. Lakin az sonra Türkiyənin rəsmi şəxsləri bəyan etmişdi ki, Ankara İsraillə münasibətləri yalnız onun rəsmən üzr istəməsindən sonra bərpa edəcək. Təl-Əviv isə buna rədd cavabı vermişdi.
