Azərbaycan, Bakı, 26 sentyabr /Trend, müxbir A.Tağıyeva/
Bazar ertəsi Türkiyənin Təbii fəlakətlər və bədbəxt hadisələr departamenti ölkədə suriyalı qaçqınların sayının 7 605 nəfərə çatdığı barədə bəyanat verib. Bu barədə Trend "Haber7" qəzetinə istinadən xəbər verir.
Bəyanata görə, Suriyada iğtişaşlar başlanandan ölkə hakimiyyətinin suriyalı qaçqınlara kömək üçün ayırdığı humanitar yardımın məbləği 17,75 milyon lirəyə çatıb.
Suriyada iğtişaşlar başlanandan Türkiyədə suriyalı qaçqınların sayı 18 568 nəfəri ötüb. Onların 10 963 nəfəri artıq vətənə qayıdıb.
Suriyada kütləvi etiraz aksiyaları martın ortalarından ölkənin cənubundakı Dəra şəhərindən başlayıb, daha sonra isə ölkənin digər regionlarını əhatə edib. BMT-nin məlumatına görə, toqquşma qurbanlarının sayı 2,7 min nəfəri ötüb. Suriya hakimiyyəti hər iki tərəfdən 1,4 min nəfərin həlak olduğunu bildirir.
Müxalifət Prezident Bəşşar əl-Əsədin istefasını və siyasi islahatların keçirilməsini tələb edir. Rejimin əleyhdarları hakimiyyətə müxalif orqan kimi Suriya Milli Keçid Şurasını (SMK) formalaşdırıblar.
