Azərbaycan, Bakı, 28 mart / Trend müxbir M.Əliyev/
Bakıda aprelin 2-4 tarixlərində keçiriləcək Avronest Parlament Assambleyasının sessiyasında 13 nəfərdən ibarət Ermənistan nümayəndə heyəti iştirak edəcək. Bunu Trend-ə Azərbaycanın Avronest Parlament Assambleyasdakı (PA) nümayəndə heyətinin üzvü, deputat Fuad Muradov bildirib.
Onun sözlərinə görə, Ermənistan nümayəndə heyətinə 10 deputat və 3 nəfər deputat köməkçisi daxildir.
Muradov qeyd edib ki, Azərbaycan tərəfindən Ermənistan nümayəndə heyətinin təhlükəsizliyinə tam təminat verilib.
Avronest PA sessiyası çərçivəsində büro və komitələrin iclasları, daha sonra PA-nın plenar iclası keçiriləcək.
Sessiyada müzakirə ediləcək məsələlərə gəldikdə, 4 komitə üzrə hazırlanacaq məruzələrin mövzuları müəyyənləşib.
Avronest PA-nın Bakı sessiyası qurumun Avropa İttifaqından kənarda keçirəcəyi ilk sessiya olacaq.