Sergey Lavrov: Rusiya-Azərbaycan münasibətləri strateji tərəfdaşlıq və təhlükəsizlik prinsiplərinə söykənir
Azərbaycan, Bakı, 4 aprel /Trend/
Azərbaycan Parlamentinin sədri Oqtay Əsədov çərşənbə günü Rusiya xarici işlər naziri Sergey Lavrovun başçılıq etdiyi nümayəndə heyətini qəbul edib.
Trend Milli Məclisin rəsmi saytına istinadən məlumat verir ki, görüşdə sədr bildirib ki, ikitərəfli əməkdaşlığımızın müasir tarixi 1992-ci il aprelin 4-dən başlayır. Məhz bu gün Azərbaycanla Rusiya arasında diplomatik əlaqələrin qurulmasının 20 ili tamam olur. Bu illər ərzində ölkələrimiz arasında möhkəm tərəfdaşlıq ənənələri formalaşıb. Dostluq və qarşılıqlı anlaşma kimi dəyərlər münasibətlərimizin əsasını təşkil edir. Dövlət başçılarımızın qarşılıqlı səfərləri, görüşləri zamanı aparılan danışıqlar, ölkələrimiz arasında imzalanmış 160-dan çox sənəd əməkdaşlığımızın gələcək inkişafı üçün yaxşı zəmin yaradıb.
Söhbətdə spiker bildirib ki, bu gün Rusiya şirkətləri Azərbaycan iqtisadiyyatının inkişafında fəal iştirak edirlər. Ölkələrimiz arasında ticarət dövriyyəsi ilbəil artır. Ölkəmizdə rus mədəniyyətinə və rus dilinə böyük maraq var. Heç də təsadüfi deyil ki, müstəqil Azərbaycanda 500-dən çox məktəbdə dərslər rus dilində tədris olunur, ali məktəblərdə rus dilinin incəlikləri öyrənilir.
"Biz bütün sahələr üzrə əlaqələrimizin dinamik inkişafını yüksək qiymətləndiririk. Münasibətlərimizin daha da dərinləşməsində, sözsüz ki, parlamentlərimiz əhəmiyyətli rol oynayır. Milli Məclislə Rusiya Federal Məclisi arasında əməkdaşlıq haqqında bağlanmış müqavilənin müddəalarına əsaslanan əlaqələrimiz daha dinamik xarakter almaqdadır. Biz bu sahədə dostluq qruplarının fəaliyyətini önəmli hesab edirik. İnanırıq ki, hər iki ölkə parlamentariləri xalqlarımızın rifahı naminə münasibətlərimizin daha da dərinləşməsi işinə gələcəkdə öz dəyərli töhfələrini verəcəklər", - Əsədov deyib.
Milli Məclisin sədri regionun inkişafına böyük maneçilik törədən Dağlıq Qarabağ münaqişəsindən söz açaraq, problemin həlli ilə məşğul olan ATƏT-in Minsk qrupunun həmsədrlərindən biri kimi Rusiyanın bu məsələdə səylərini artıracağına inamını ifadə edib.
Rusiyanın xarici işlər naziri Sergey Lavrov ölkəmizə səfərindən və burada keçirdiyi görüşlərdən məmnun qaldığını söyləyib. O qeyd edib ki, Rusiya-Azərbaycan münasibətləri strateji tərəfdaşlıq və Cənubi Qafqazda təhlükəsizlik prinsiplərinə söykənir. Bu günədək həyatın müxtəlif sahələrinə aid ölkələrimiz arasında imzalanmış sənədlər fəaliyyət üçün geniş imkanlar yaradır. Yaxın zamanlarda münasibətlərimizin daha da dərinləşməsi baxımından əhəmiyyətli olan yeni hüquqi sənədlərin imzalanması gözlənilir.
Sergey Lavrov siyasi, iqtisadi sahələrlə yanaşı, humanitar sahədə də əlaqələrimizin yüksək olduğunu vurğulayaraq, Azərbaycanda rus dilinə olan marağı yüksək dəyərləndirib. O, yaxın vaxtlarda Bakıda İkinci Humanitar Forumun keçiriləcəyi xəbərindən məmnun olduğunu söyləyib. Qonaq əlaqələrimizin parlament ölçüsündən söz açaraq deputatlarımızın nüfuzlu beynəlxalq qurumlarda, o cümlədən AŞ PA, QDİƏT Parlament Məclisində birgə fəaliyyətlərini təqdirəlayiq hesab edib.
Sergey Lavrov Dağlıq Qarabağ münaqişəsindən söz açaraq, problemin həlli istiqamətində Rusiyanın səylərini əsirgəməyəcəyini bildirib.
Söhbətdə tərəfləri maraqlandıran məsələlər ətrafında fikir mübadiləsi aparılıb.
Görüşdə parlament Aparatının rəhbəri Səfa Mirzəyev, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov, ölkəmizin Rusiya Federasiyasındakı səfiri Polad Bülbüloğlu, Rusiyanın Azərbaycandakı səfiri Vladimir Doroxin və digər rəsmi şəxslər iştirak ediblər.
