Azərbaycan, Bakı, 10 sentyabr / Trend, müxbir A.Axundov /
Azərbaycanla Avropa İttifaqı (Aİ) arasında viza sazişi ilə bağlı növbəti görüş sentyabr-oktyabrda keçiriləcək. Bu barədə Trend-ə xarici işlər nazirinin müavini Mahmud Məmmədquliyev məlumat verib.
"Görüşün sentyabrda keçirilməsi ilə bağlı ilkin razılaşma əldə olunub, indi biz dəqiq tarixi razılaşdırırıq. Hesab edirəm ki, növbəti danışıqlar sentyabr-oktyabrda keçiriləcək", - Məmmədquliyev deyib.
Aİ ilə Azərbaycan arasında viza rejiminin sadələşdirilməsi və readmissiya haqqında rəsmi danışıqlar mart ayında Bakıda başlayıb. Məmmədquliyevin sözlərinə görə, məzuniyyət dövrünün başlaması ilə bağlı danışıqlarda fasilə yaranıb.
"Çox güman ki, biz videokonfranslarla başlayacağıq, əgər sonra plenar iclasın keçirilməsinə ehtiyac olarsa, biz onu keçirəcəyik", - nazir müavini bildirib.
