Azərbaycan, Bakı, 23 aprel /Trend/
Avropa İttifaqının 27 ölkəsinin Luksemburqda keçirdiyi görüşdə İrana qarşı yeni sanksiyalar haqqında müzakirələr olmayıb. Trend-in RİA Novostiyə istinadən verdiyi xəbərdə deyilir ki, bunu Aİ diplomatiyasının rəhbəri Ketrin Eşton deyib.
"Biz hər hansı yeni sanksiyanın qəbul edilməsi imkanlarını müzakirə etməmişik" - Eşton bildirib.
Məlumatda deyilir ki, Böyük Britaniyanın XİN rəhbəri Vilyam Heyq deyib ki, Avropa İttifaqı İrana qarşı qəbul edilmiş sanksiyaların reallaşdırılmasına başlanılmalıdır.
"Əlavə hansısa sanksiyalara ehtiyac yoxdur" - deyə Heyq əlavə edib.
Eşton öz növbəsində vurğulayıb ki, o, yaxın vaxtlarda İranın Ali Təhlükəsizlik Şurasının sədri Səid Cəlili ilə bundan sonrakı addımların atılması üçün əlaqə saxlayacaq.