Kopenhagendə ATƏT PA-nın Bakıda keçiriləcək illik sessiyasına hazırlıq məsələsi müzakirə olunacaq

Azərbaycan, Bakı, 5 aprel /Trend, müxbir İ.İzzət/

Aprelin 5-də Milli Məclis sədrinin müavini, ATƏT-in Parlament Assambleyasındakı (ATƏT PA) Azərbaycan nümayəndə heyətinin rəhbəri Bahar Muradova və Milli Məclisin deputatı, ATƏT PA-nın Büro üzvü, həmçinin qurumun Təhlükəsizlik və siyasi məsələlər Ümumi Komitəsi sədrinin müavini Azay Quliyev Danimarkanın paytaxtı Kopenhagenə səfərə yola düşəcəklər.

Milli Məclisin mətbuat xidmətindən Trend-ə verilən məlumata görə, parlamentarilərimiz ATƏT PA-nın Büro iclasında iştirak edəcəklər.

Büroda öncə ATƏT PA-nın sədri Ranko Krivokapiç çıxış edəcək, daha sonra ATƏT PA-nın baş katibi Spenser Oliverin məruzəsi dinləniləcək.

İclasda əsas diqqət ATƏT PA-nın cari il iyunun 28-dən iyulun 2-dək Bakıda keçiriləcək 23-cü illik sessiyasında müzakirəyə çıxarılacaq məsələlərə yönəldiləcək. Həmin məruzə və qətnamə layihələrini Büro üzvlərinə qurumun Təhlükəsizlik və siyasi məsələlər, İqtisadi məsələlər, elm, texnika və ətraf mühit, Demokratiya, insan hüquqları və humanitar məsələlər üzrə Ümumi Komitələrinin məruzəçiləri təqdim edəcəklər. Milli Məclis sədrinin müavini Bahar Muradova Büro iclasında çıxış edərək ATƏT PA-nın Bakıda keçiriləcək sessiyasına hazırlığın gedişi barədə ətraflı məlumat verəcək.

İclasda ATƏT PA-nın seçkilərdəki müşahidəçilik missiyası, həmçinin qurumun Xüsusi komitələrinin və Xüsusi nümayəndələrinin fəaliyyəti və digər məsələlər barədə də informasiya veriləcək.

Səfər aprelin 8-də başa çatacaq.