Azərbaycan, Bakı, 12 sentyabr /Trend, müxbir Səba Ağayeva/
Azərbaycan İsveç xarici işlər nazirinin "xüsusi əlaqələri" və iddiaları barədə məlumatlandırılmışdı və ona görə də deyirdi: "görün, bizim haqqımızda kim fikir formalaşdırır". Trend xəbər verir ki, bu barədə Azərbaycan Prezidenti Administrasiyası rəhbərinin müavini, Xarici əlaqələr şöbəsinin müdiri Novruz Məmmədov "Twitter" sosial şəbəkəsindəki səhifəsində yazıb.
N.Məmmədov yazır: "Aftonbladet" qəzetinin məlumatından aydın olur ki, nazir Karl Bildtin tənqidlərinə məruz qalmamaq üçün onunla "xüsusi əlaqələr" qurmaq lazımdır".
Qeyd edək ki, İsveçdə qalmaqal yaranıb: "Aftonbladet" qəzeti XİN rəhbəri K.Bildti korrupsiyada və Gürcüstanın keçmiş rəhbərliyinə tamahkar lobbiçilikdə günahlandırıb.
Jurnalistlər iddia edirlər ki, K.Bildtlə əlaqəsi olan PR firma 3 milyon dollardan artıq vəsait müqabilində Mixeil Saakaşvilinin Avropada imicinin yaxşılaşdırılması ilə bağlı bu ölkənin əvvəlki hakimiyyətindən pul alıb.
İsveçin xarici işlər naziri dəfələrlə Azərbaycanın ünvanına əsassız tənqidlərlə çıxış edib.