Bakı. Elçin Mehdiyev - Trend:
Dövlət büdcəsindən məcburi köçkünlərin və onlara bərabər tutulan şəxslərin sosial müdafiəsi üçün ayrılan vəsaitin ünvanlılığının təmin edilməsi və çatdırılma mexanizminin sadələşdirilməsi ilə bağlı Prezident İlham Əliyev tərəfindən imzalanan fərman ünvanlılığı təmin edəcək.
Trend-in məlumatına görə, bunu Əmək və sosial siyasət komitəsinin sədri Hadı Rəcəbli komitənin bu gün keçirilən iclasında deyib.
H.Rəcəbli bildirib ki, eyni zamanda bəzi neqativ halların qarşısı alınacaq: “Bundan əvvəl vəsait ümumilikdə işıq, qaz idarələrinə ayrılırdı. Bu məsələyə diqqət yetirmək çətin olurdu. Orada da problemlər olurdu. 20 manat yemək pulu, 15 manat isə enerji resursları ilə bağlı vəsait idi. İndi 36 manat adambaşına nəzərdə tutulub. Bu rəqəmin özü də məqbuldur”.
Komitə sədri hesab edir ki, bu fərman eyni zamanda həmin kateqoriyadan olan insanları qənaətcilliyə həvəsləndirəcək.