Bakı. Trend:
9 sentyabrda BQXK-sinin (Beynəlxalq Qırmızı Xaç Komitəsi) humanitar
yükü Samur keçid məntəqəsindən daxil olanda biz hesab edirdik ki,
bu beynəlxalq təşkilatın eqidası altında gələn yüklər hardan
gəlməsindən asıllı olmayaraq öz ünvanına çatacaqdır. Yəni bizim
düşüncəmiz təmiz olduğundan yanaşmalarımız da ədalət üzərində
qurulmuşdur. Hesab edirdik ki, BQXK-sinin ofisinin hansı ölkədə
yerləşməsi əsas şərt deyil. Ona görə də Laçın yolu vasitəsilə
BQXK-sinə xəstələrin və həyatı vacib vasitələrin daşınmasına icazə
verilmişdir. Amma hadisələrin inkişafı BQXK-sinin də düşündüyümüz
kimi saf niyyətli fəaliyyətlə məşğul olmadığını sübut edir.
Bunu Trend-ə Milli
Məclisin deputatı Azər Badamov deyib.
O qeyd edib ki, belə ki, Rusiya BQXK-nin yükü də Bərdədə otelin
qarşısında gözləyir və buraxılmır.
“Bu o deməkdir ki, humanitar yüklərin daşınması üçün BQXK-nin hansı
ölkələrə aid olması əsas şərtdir. İlk baxışda BQXK-si eyni
konvensiya altında fəaliyyət göstərdiyi görünsə də reallıqda isə
selektiv yanaşmalar mövcuddur və Xankəndinə humanitar yükü
göndərdiyinə görə Rusiya BQXK-nə təzyiqlər göstərilir. Bu bir daha
BQXK-nin əsil məramını üzə çıxardır. Biz bunu 44 günlük Vətən
müharibəsi zamanı da müşahidə etmişdik. O vaxtı BQXK-si erməni
silahlıları Füzulidən çıxartmağa cəhd etmişdi və kəşfiyyat
məlumatları toplayaraq düşmənə ötürürdü. Müharibə başa çatandan
sonra da BQXK-si Ermənistandan Xankəndinə intensiv şəkildə
daşımalar həyata keçirirdi. Amma bu yüklər yoxlanılmadığından
avtomobillərdə nə daşındığı suallar doğurur. Hətta sərhəd
xidmətimiz tərəfindən BQXK-sinin qaçaqmalçılıqla məşğul olduğunu
ifşa etmişik”, - deyə deputat bildirib.
O əlavə edib ki, indi də BQXK-si Xankəndinə ancaq Ermənistandan
humanitar yüklərin daşıya biləcəyi kimi fikir ortaya qoyur.
“Bu, humanitar yardımlarla bağlı neytral fəaliyyətlə məşğul olmalı
olan beynəlxalq təşkilatın siyasi məsələlərə və öz çirkin
niyyətlərin reallaşdırılmasına cəlbi deməkdir. Əgər BQXK-sinin
məramı ehtiyacı olan insanlara humanitar yardımın göstərilməsindən
ibarətdirsə, onun hansı istiqamətdən göstərilməsinin nə əhəmiyyəti
var? Amma hadisələrin inkişafı bir daha sübut edir ki, BQXK-si
Qərbin əlində siyasi manipulyasiyalar etmək üçün alətə çevrilib.
BQXK-sinin ofisi birmənalı şəkildə bilməlidir ki, hətta
Ağdam-Xankəndi yolu açıldığı təqdirdə onlar öz emblemi altında
əvvəllər olduğu kimi öz çirkin niyyətlərinı davam etdirə
bilməyəcəklər”, - deyə A.Badamov vurğulayıb.
Qeyd edək ki, Rusiya Qızıl Xaç Cəmiyyətinin yük maşınının bu gün səhər saatlarından etibarən Ağdama, oradan isə Əsgərana daxil olmasının təmin ediləcəyi gözlənilirdi. Lakin hələ də Rusiya Qızıl Xaç Cəmiyyətinin yük maşınının Əsgərana daxil olması təmin edilməyib. Rusiya Qızıl Xaçının ərzaq maşını hazırda Bərdədə dayanıb. Bu maşın Ağdam-Xankəndi yolu ilə Xankəndinə hərəkət etməli olduğu halda, hələ də hərəkət etmir.