Bakı. Trend:
Ermənistanın baş naziri Nikol Paşinyan ABŞ dövlət katibi Antoni Blinkenlə telefon danışığı aparıb.
Trend-in məlumatına görə, bu barədə Ermənistan hökumətinin mətbuat xidməti bildirib.
Məlumata əsasən, danışıq zamanı tərəflər ikitərəfli gündəliyi və Ermənistan-Azərbaycan münaqişəsini müzakirə ediblər:
"Həmsöhbətlər Ermənistan-ABŞ ikitərəfli münasibətlərinin gündəliyi, aprelin 5-də Brüsseldə keçirilən görüş, o cümlədən Ermənistan-Azərbaycan sülh prosesi ilə bağlı məsələləri müzakirə ediblər. Nikol Paşinyan ikitərəfli münasibətlərin intensivləşməsindən məmnunluğunu ifadə edib. Baş nazir, həmçinin aprelin 5-də Brüsseldə əldə olunmuş razılaşmaların həyata keçirilməsinin vacibliyini vurğulayaraq, bu razılaşmaların görüşün yekunlarına dair mətbuata açıqlamada ifadə edildiyini və görüşün heç bir gizli gündəminin olmadığını qeyd edib", - deyə bildirilib.
Bildirilib ki, Paşinyan danışıq zamanı “Ermənistan-Azərbaycan dövlət sərhədinin demarkasiyası prosesini müsbət dəyərləndirib".