İyulun 15-dən ABŞ-da işgüzar səfərdə olan Demokratik İslahatlar Partiyasının(DİP) sədri, millət vəkili Asim Mollazadə Vaşinqtonda artıq bir sıra görüşlərdə iştirak edib. Bu haqda Trend ə DİP-in mətbuat xidmətindən bildirilib.
Məlumatda, iyulun 18-də DİP sədrinin ABŞ-ın iki aparıcı araşdırma mərkəzində - Enterprayz İnstitutunda və Karnegi Fondunda çıxış etdiyi bildirilir.
DİP sədri öz çıxışında Azərbaycanda seçkiqabağı vəziyyət barədə məlumat verərək həmçinin, seçkilərin demokratik keçirilməsi üçün zəruri olan islahatlara toxunub.
DİP-in məram və məqsədləri barədə məlumat verən Asim Mollazadə, daha sonra görüş iştirakçılarına rəhbərlik etdiyi partiyanın Ermənistan-Azərbaycan münaqişəsinin həllinə dair mövqeyini ifadə edib.
Asim Mollazadə, öz çıxışında Azərbaycanda demokratik parlament seçkilərinin keçirilməsinin ölkədə sabitliyin və inkişafın əsas təminatı olacağını xüsusilə vurğulayıb. DİP sədri, həmçinin, çıxışlarında ABŞ-Azərbaycan münasibətlərinə də toxunub.
Məlumatda, DİP sədrinin iyulun 20-də "Ağ Ev", Dövlət Departamenti və Pentaqonda görüşlər keçirməsinin nəzərdə tutulduğunu bildirib.
Qeyd edək ki, DİP sədri Asim Mollazadənin ABŞ səfəri həftəsonu başa çatacaq.