Azərbaycan Xalq Cəbhəsi Partiyasının (AXCP-islahatçılar) sədri Əli Kərimli "Yeni fikir" gənclər təşkilatının rəhbəri Ruslan Bəşirli ilə bağlı məsələnin araşdırılmasına yardım göstərməsi üçün Gürcüstan prezidenti Mixail Saakaşviliyə müraciət edib.
Bu barədə Trend ə AXCP-dən məlumat verilib. Müraciətdə Ruslan Bəşirli ilə Tbilisidə görüşmüş şəxslərin kimliyinin obyektiv araşdırılması, bu hadisəylə bağlı həqiqətlərin üzə çıxması məqsədilə prezident M.Saakaşvilinin Gürcüstan hüquq-mühafizə orqanlarının müvafiq tədbirlər görməsinə sərəncam verməsi xahiş olunur.
AXCP-dən o da bildirilib ki, "Realnaya Azerbaydjan" qəzetinin 19 avqust tarixli sayında dərc olunmuş AXCP sədrinin Gürcüstan prezidentinə göndərdiyi məktub həmin müraciətin əsli deyil, qəzet redaktorunun özündən yazdığı, imzasız saxta bir müraciətdir.