Avqustun 26-da Azərbaycan Demokrat Partiyasının (ADP) qərargahında "Azadlıq" blokuna daxil olan partiyaların seçki məsələləri üzrə məsul olan şəxslərinin toplantısı keçirilib. ADP funksioneri Taliyət Əliyevin Trend agentliyinə verdiyi məlumata görə, toplantıda Müsavatdan Arif Hacılı, Azərbaycan Xalq Cəbhəsi Partiyasından (AXCP) isə Həsən Kərimov iştirak edib.
T.Əliyev bildirib ki, toplantıda "Azadlıq blokunun Mərkəzi Seçki Qərargahının strukturu formalaşdırılıb. Qərara alınıb ki, qərargaha rəhbərlik həmsədrlər formasında həyata keçirilsin: "Qərargaha hər həftə "Azadlıq"da təmsil olunan partiyaların seçki məsələlərinə məsul olan şəxslərin biri rəhbərlik edəcək. Gələn həftə missiyanı mən yerinə yetirəcəyəm"-deyə o bildirib.
ADP funksioneri onu da qeyd edib ki, "Azadlıq" blokunun Mərkəzi Seçki Qərargahı hələlik ADP-nin qərargahında yerləşsə də, onun neytral bir ünvana köçürülməsi də gündəmdə duran məsələlərdəndir.
Mərkəzi Seçki Qərargahına 50-yə yaxın hüquqşünasın cəlb ediləcəyini deyən T.Əliyev qeyd edib ki, onlar seçki ilə bağlı məsələlərə hüquqi yardım göstərəcəklər.