Sentyabrın 6-da Ağır Cinayətlərə Dair İşlər Üzrə hərbi Məhkəmədə hakim Qədim Babayevin sədrliyi ilə Tərtərdəki N saylı hərbi hissədə qulluq etmiş üç əsgərin məhkəməsi davam etdirilib. Trend in məlumatına görə, müttəhimlər kürsüsündə əyləşmiş çavuş Ruslan Bəkirov və sıravilər Xəyal Abdullayevlə Hikmət Tağıyev Azərbaycan Respublikası Cinayət Məcəlləsinin 274-cü (Vətənə xəyanət)? 334.3-cü (fərarilik) və 338.1 (həbri növbətçilik qaydalarının pozulması) maddələri ilə ittiham olunur. Hər üç əsgər bu il fevralın 15-də Tərtərin "Tülkü dərəsi" adlanan ərazisində ermənilərə əsir düşüblər.
Əsgərlərsə onlara qarşı irəli sürülmuş 274-cü maddə ilə təqsirli bilmirlər. Məhkəmə iclasında ifadə verən Ruslan Bəkirov təqsirsiz olduqlarını iddia edib. İfadəsində göstərib ki, düşmən tərəfə ibtidai istintaq materiallarında göstərildiyi kimi, könüllü yox, meşədə yolu azaraq keçiblər.
Əsirlikdə qaldıqları üç ay ərzində düşmənə Azərbaycanın mənafeyinə zidd olan heç bir məlumat və hərbi sirr verməyiblər. R.Bəkirov Ermənistanın xüsusi xidmət orqanları ilə işləməklərinə dair irəli sürülmüş ittihamları da rədd edib. Bildirib ki, ibtidai istintaq zamanı onların hər üçündən təzyiqlər altında saxta ifadələr alınıb.
