"Bizim Azərbaycan" seçki blokunun mərkəzi seçki qərargahı yaradılmayacaq". Bu barədə Trend ə adıçəkilən seçki blokunda təmsil olunan 10 saylı Binəqədi üçüncü seçki dairəsindən deputatlığa namizəd Xalq Azadlıq Partiyasının sədri Valeh Mirzəyev bildirib.
V.Mirzəyev qeyd edib ki, blokda təmsil olunan və namizədliyini verən 16 partiya rəhbəri ilə mütəmadi əlaqələr yaradıldığından mərkəzi seçki qərargahının formalaşdırılmasına ehtiyac qalmır: "Blokumuzdan yalnız Yaşıllar Partiyası, Sosial Demokrat Xalq Partiyası və Əmək Partiyasının rəhbərləri seçkiyə qatılmayıblar. Ancaq onlar namizədlərin seçki təbliğatında fəal iştirak edirlər".
Partiya sədri onu da bildirib ki, eyni seçki dairəsindən olan "Bizim Azərbaycan" seçki blokunun namizədləri "Azadlıq" blokunun namizədlərinə heç bir güzəştə getməyəcəklər: "Bu barədə heç fikirləşməmişik də. Onlara qarşı antitəbliğat aparmaq niyyətindən də uzağıq. Hər bir namizədə hörmətlə yanaşırıq. Onların da bizimlə işləri yoxdur".
Qeyd edək ki, vaxtilə "Bizim Azərbaycan" blokunda olan bir neçə partiya Müsavat Partiyasının başqanı İsa Qəmbərlə birgə "Azadlıq" blokunda təmsil olunublar.
V.Mirzəyev onu da vurğulayıb ki, iqtidarla o qədər də bölüşə bilmədikləri məsələlər yoxdur. Blok prezidentin son sərəncamını yüksək qiymətləndirir.
