NATO ilə Azərbaycan Respublikası arasında imzalanmış fərdi proqrama uyğun olaraq "Sülh Naminə Tərəfdaşlıq" proqramı çərçivəsində yanvarın 9-dan 13-dək Almaniyanın Oberammerqau şəhərində "Qərargah zabitləri üçün tanışlıq" kursu keçirilib. Bu barədə Trend ə Azərbaycan müdafiə nazirliyinin mətbuat xidmətindən məlumat daxil olub.
Məlumatda həmçinin bildirilir ki, yanvarın 9-dan martın 11-dək Budapeşt şəhərində "Hərbi ingilis dili" kursu, yanvarın 11-dən 13-dək isə Norveçin Stavanger şəhərində "Steadfast Jaw-06" təliminin ilkin planlaşdırma konfransı və Brüssel şəhərində "Avropa adi silahlı qüvvələr" müqaviləsi çərçivəsində "VERİTİ" işçi qrupunun görüşü keçirilir.
Bununla yanaşı, Azərbaycan ilə ABŞ arasında imzalanmış ikitərəfli hərbi əməkdaşlıq planına əsasən yanvarın 9-dan 11-dək Bakı şəhərində "Topoqrafiya və kartoqrafiya" mövzusunda seminar təşkil olunub.
Azərbaycan ilə Böyük Britaniya arasında imzalanmış ikitərəfli hərbi əməkdaşlıq planına əsasən isə yanvarın 9-dan fevralın 17-dək Çexiya Respublikasının Vişkof şəhərində "Sülhü dəstəkləmə əməliyyatları üzrə təlimatçılar üçün təlim kursu" keçirilməkdədir.
Həmçinin bildirilir ki, Azərbaycan ilə Litva arasında imzalanmış ikitərəfli hərbi əməkdaşlıq planına müvafiq olaraq yanvarın 9-da Vülnyus şəhərində "Beynəlxalq ingilis dili" kursu başlayıb. Kurs aprelin 28-dək davam edəcək.
Nəhayət Azərbaycan ilə Almaniya Federativ Respublikası arasında imzalanmış ikitərəfli hərbi əməkdaşlıq planına əsasən yanvarın 10-dan iyunun 30-dək Hürt şəhərində "Silahlara nəzarət kursu" keçiriləcək.
Tədbirlərdə Azərbaycan silahlı qüvvələrinin nümayəndələri iştirak edirlər.
Trend-in ən mühüm və maraqlı xəbərlərini "Telegram"da izləyin
.jpg)
