Salyan - Sabirabad avtomobil yolunun 5-ci km-də, Noxudlu kəndi ərazisində, yolun kənarında 1,5 sutka qalmış 2107 markalı avtomobil yerli sakinlərdə şübhə doğurduğundan Salyan rayon polis idarəsinə müraciət ediblər. Polislər avtomaşina baxış keçirərkən arxa oturacaqdan başına və sifətinə vurulmuş küt zərbələrdən qətlə yetirilmiş avtomobil sahibi, 1968-ci il təvəllüdlü Əli-Bayramlı şəhər sakini Akif İslam oğlu Abdullayevin cəsədini aşkar edib. İlkin müayinə zamanı mərhumun üzərində olan pulun və mobil telefonun götürülməməsi qətlin qisas zəminində törədilməsi versiyasını istisna etmir. Faktla bağlı Salyan rayon prokurorluğunda cinayət işi qaldırılıb.
...